මොනරාගල අධ්‍යාපන කලාපයේ සියඹලාණ්ඩුව ජාතික පාසලේ නිහාරා ඉමල්ෂි 2024 සමස්ත ලංකා පාසල් ක්‍රීඩා තරගාවලියේදී 16න් පහළ හෙල්ල විසිකිරීමේ තරගයෙන් ප්‍රථම ස්ථානය ලබා රන්පදක්කම හිමිකරගෙන ඇත. මෙම තරගය කොළඹ සුගතදාස ක්‍රීඩාංගනයේදී පසුගිය දා පැවැත්විණි. මොනරාගල දිස්ත්‍රික්කයේ අති දුෂ්කර පාසලක් වන සියඹලාණ්ඩුව ජාතික පාසල මෙවැනි ජයග්‍රහණයක් ලැබූ ප්‍රථම අවස්ථාව මෙයයි. විදුහල්පති ජේ.ඒ. විමලසේන ජයසිංහ මහතාගේ සහ ක්‍රීඩා සහ ශාරීරික අධ්‍යාපන ආචාර්ය ශශිනී දිල්ශාරා විජේරත්න මහත්මියගේ මඟපෙන්වීම මත ක්‍රීඩා පුහුණුකරුවන් වන අනුරුද්ධ ප්‍රියදර්ශන පෙරේරා සහ ලක්මාල් නුවන් කුමාර යන මහත්වරුන් යටතේ ඇය පුහුණුව ලබා ඇත.

ඩී.එස්. ගුණතිලක -ඌව වෙල්ලස්ස විශේෂ

මොරටුව විශ්වවිද්‍යාලයේ ගොඩනැඟිලි ආර්ථික දෙපාර්තමේන්තුවේ තෙවැනි වසරේ සිසුවකු වන රුසින් තත්සර පසුගියදා “තරුණ තාරකා විද්‍යා ලේඛක” ගෞරව සම්මානයෙන් පිදුම් ලැබුවේය. දකුණු ආසියාවේ අභ්‍යවකාශ ගොඩනැඟීම් සම්බන්ධ පළමු ග්‍රන්ථය රචනා කිරීම, තාරකා විද්‍යා සහ විද්‍යාත්මක පුවත්පත් ලිපි සියයකට අධික සංඛ්‍යාවක් රචනා කිරීම, ශ්‍රී ලංකාවේ පළමු අතත්‍ය සංකල්පිත අභ්‍යවකාශ නගරය වන විමාන ව්‍යාපෘතිය, ශ්‍රී ලංකාවේ පළමු හින්දු තාරකා විද්‍යා ග්‍රන්ථය රචනා කිරීම නිමිති කොටගෙන ශ්‍රී ලංකා ජනරජයේ රාජකීය පදනමෙන් මෙම සම්මානය පිරිනමන ලදි. කීර්තිමත් තාරකා විද්‍යාඥ අනුර සී. පෙරේරා මහතාගේ මඟපෙන්වීම යටතේ සිය තාරකා විද්‍යා ලේඛන කලාව ප්‍රගුණ කළ රුසින් තත්සර ග්‍රන්ථකරණයට ප්‍රවිෂ්ට වූයේ ‘කමල් සර්ගෙන් ඔක්සිජන්’ නමැති වාර්තාගත ග්‍රන්ථය හරහා ය. මෙම සම්මානයට විශ්වවිද්‍යාල ශිෂ්‍යයකු පාත්‍ර වූ පළමු අවස්ථාව ද මෙය වේ.

චෙස් ක්‍රීඩාවෙන් මනසේ ඇති පීඩාවන් නැති කරයි. එම නිසාම අධ්‍යාපනය ලැබීමේදී එයින් ලැබෙන අධික වෙහෙස නිවා දැමීමට චෙස් හොඳ ක්‍රීඩාවක් වේ. මේ නිසා වර්තමානයේ දරුවන් කුමන හෝ ක්‍රීඩාවකට යොමු කිරීම ඉතා වැදගත් වේ. මේ අයුරින් චෙස් ක්‍රීඩාවට යොමු වී ජයග්‍රහණ රැසක් හිමි කරගත් දියණියක් පිළිබඳයි මේ කතා කරන්න සූදානම් වෙන්නේ. ඉතින් අපි ඇගේ කතාව අසමු. කොළඹ විචර්ලි ජාත්‍යන්තර පාසලේ ඉගෙනුම ලබන 12 හැවිදිරි දේවින්ද්‍යා ඔෂිනි ගුණවර්ධන ලංකාවේ මෙතෙක් බිහි වූ ළාබාලතම කාන්තා චෙස් ක්‍රීඩා ඉන්ටර්නැෂනල් මාස්ටර් බවට පත්වීම විශේෂ සිදුවීමකි. මෙම ජාත්‍යන්තර මාස්ටර් තනතුර ඇයට නිල වශයෙන් පිරිනමා තිබෙන්නේ ලෝක චෙස් සම්මේලනය (ධ්ජ්ධ්ච්ඡ්) විසිනි. මෙම තනතුර පිරිනැමීමෙන් පසුව ඒ පිළිබඳ ඇයගෙන් අප විමසීමක් කළේ අපගේ උණුසුම් සුබ පැතුම් ද පිරිනමමින් ය. මේ වනවිට ඇය පිලිපීනයේ පැවැත්වෙන ආසියානු කනිෂ්ඨ චෙස් තරගාවලියට සහභාගි වෙමින් සිටින්නී ය.

මට මේ තනතුර හිමිවුණේ ජාත්‍යන්තරව පැවැත්වූ චෙස් තරගවලින් ලැබුණු ලකුණු සලකා බැලීමෙන් අනතුරුවයි. මේ තෝරා ගැනීම සිදු කරන්නේ ලෝක චෙස් සම්මේලනය විසිනුයි. චෙස් ක්‍රීඩාවේ ජාත්‍යන්තර ශ්‍රේණිගත ලකුණු 2000 පසුකිරීම සහ අන්තර් ජාතික චෙස් තරගවලදී ඉලක්කගත ලකුණුවල සාරාංශයක් සලකා බැලීමෙන් අනතුරුව තමයි මේ තනතුර පිරිනමන්නේ. මට මේ තනතුර පිරිනැමීමත් සමඟ දැනට ලංකාවටම සිටින ඉන්ටර්නැෂනල් මාස්ටර්වරියන් තිදෙනා අතරට මගේ නමත් ඇතුළත් වෙනවා. එහෙත් මම තමයි ලංකාවේ සිටින ළාබාලතම ක්‍රීඩිකාව. අපේ රටේ මුල්ම ඉන්ටර්නැෂනල් මාස්ටර් බවට පත් වුණේ රොමේෂ් වීරවර්ධන මහතා. එයින් පසුව හර්ෂණ තිලකරත්න, සුසාල් ලොකුගේ සහ රනිඳු දිල්ෂාන් ලියනගේ පත් වුණා. දැනට ලංකාවේ ළාබාලතම ඉන්ටර්නැෂනල් මාස්ටර් වුණේ දහඅට හැවිරිදි සුසාල් ලොකුගේ ය. ඔහු මාස්ටර් බවට පත් වුණේ වයස අවුරුදු 14දියි.”

” මම මුල්ම ජාත්‍යන්තර තරගයක් ජයග්‍රහණය කළේ පසුගිය වසරේදී. ඒ වසරේදී මම ජයග්‍රහණ දෙකක් ලැබුවා. ඒ ජයග්‍රහණ දෙක අතරින් විශේෂම තරගය තමයි ලෝක යොවුන් ශුරතා තරගාවලිය. ඒ තරගය සඳහා රටවල් 84ක් සහභාගි වුණා. මම අවුරුදු 12න් පහළ තරගයෙන් ශූරතාව දිනා ගත්තා. එයින් පසුව පැවැත්වුණු තරගය තමයි ආසියානු යොවුන් චෙස් ශූරතාවලිය. ඒ තරගය පැවැත්වුණේ ඩුබායිවල. මම ඒ තරගයට සහභාගි වුණේ අවුරුදු 20න් පහළ තරගකාරියක් ලෙසයි. ඒ තරගයට සහභාගි වුණේ මට වඩා වයසින් වැඩි තරගකාරියන්. එහෙත් මම ඒ තරගයෙන් දෙවැනි ස්ථානය හිමිකර ගත්තා.”

”මේ තරග දෙකට අමතරව මම 2021 සහ 2022 දී ආසියානු යොවුන් චෙස් තරගයටත් සහභාගි වුණා. මම ඒ තරගයට අමතරව පොදු රාජ්‍ය මණ්ඩලීය තරගයටත් සහභාගී වී ජයග්‍රහණ රැසක්ම හිමිකර ගත්තා. ඒ වගේම මේ වසරේදී මට තවත් විශේෂිත සම්මානයක් හිමි වුණා. ඒ තමයි The Girls player of the year කියන සම්මානය. මේ සම්මානය පිරිනැමුවේ ආසියානු චෙස් පදනමෙන්.”

ඇයට ඇගේ අරමුණ

වෙත යෑමට භාග්‍යය උදා වේවා යැයි අපි මිහිර වෙතින් සුබ පතමු.

දුමින්ද කාරියවසම්

ගම්පහ දිස්ත්‍රික් බාලදක්ෂ සංගමය සංවිධානය කළ “ගම්පහ දිස්ත්‍රික් පෝතක රන් දහර” වැඩසටහන යක්කල ශ්‍රී චන්ද්‍රජෝති විද්‍යාලයේදී පසුගියදා පැවැත්විණි. ගම්පහ බාලදක්ෂ දිස්ත්‍රික් විධායක සභාවේ භාණ්ඩාගාරික සිසිරු කුමාර මහතාගේ ප්‍රධානත්වයෙන් හා යක්කල ශ්‍රී චන්ද්‍රජෝති මහා විද්‍යාලයේ විදුහල්පති අනුරාධ දයාරත්න මහතා ඇතුළු දිස්ත්‍රික් නිලධාරී මණ්ඩලයේ සහභාගිත්වයෙන් මෙම වැඩසටහන දවස පුරා පැවැත්විණි. දිසා කොමසාරිස් ජනක සුගත් පෙරේරා මහතාගේ මඟපෙන්වීම යටතේ සහාය දිසා කොමසාරිස් (පෝතක) අමල්කා කිණිගම මහත්මිය මෙම වැඩසටහන සංවිධානයකර තිබිණි. පෝතක බාලදක්ෂ බාලක බාලිකාවන් හාරසීයකට අධික සංඛ්‍යාවක් මෙයට සහභාගි වී සිටියහ.

විධායක සභාවේ ගණන් පරීක්ෂක කපිල කුමාර, ජ්‍යෙෂ්ඨ පුහුණු කිරීමේ නායිකා ලක්ෂ්මි කුමාරගම, හිටපු සහය දිසා කොමසාරිස් පෝතක දුෂ්මන්ත රාජපක්ෂ යන මහත්ම මහත්මීහු ද මෙම අවස්ථාවට එක්ව සිටියහ.

නුවන් කොඩිකාර

ගිනි දළු නැඟ එති

රත් පැහැ විහිදෙති

ගනඳුර බිඳ වැටී

එළිවෙති

සැම දෙසේ බාලයන්

වී උතුම් දක්ෂයන්

ලෝකෙට වැඩ සඳහා

ජය පතව්…..

ශ්‍රී ලාංකේය බාලදක්ෂයන් තම ගිනිමැලය අරඹමින් “ගිනිමැල තේමා ගීතය” ලෙස එක්ව ගායනා කරන ඉහත ගීතය මෙරට සෑම බාලදක්ෂයකුම දන්නවා ඇති. එහෙත් එයින් බහුතරයක් එම ගීතයේ නිර්මාතෘවරයා සහ පද රචකයා පිළිබඳ නොදන්නවා ඇති. ඔහු නමින් දේශීය බාලදක්ෂ කෙත තම දැනුමෙන්, හැකියාවෙන් සහ විශිෂ්ට භාෂා ඥනයෙන් නිර්ලෝභීව අස්වැද්දූ , මෙරට බාලදක්ෂ ලේඛන කලාවේ අති ශ්‍රේෂ්ඨයකු වන දිවංගත ඩබ්ලිව්. ජෝසප් ඩයස් ගුණරත්න හෙවත් ” දයා ගුණේ” මහතා ය.

1926 පෙබරවාරි 20 වැනිදා මෙලොව එළිය දුටු එතුමා දියලගොඩ ඉංග්‍රීසි විදුහලෙන් මූලික අධ්‍යාපනය ලබා ඇති අතර, එම විදුහල් බාලදක්ෂ සමූහය වූ 1 වැනි දියලගොඩ බාලදක්ෂ කණ්ඩායමේ බාලදක්ෂයකු ලෙස බාලදක්ෂ ව්‍යාපාරය සමඟ අත්වැල් බැඳගෙන ඇත.

පාසල් කාලයෙන් අනතුරුව බාලදක්ෂ ආචාර්යවරයකු ලෙස කටයුතු කිරීම ඇරඹූ ඒ මහතා මග්ගොන චරිතශෝධනාගාරය , පොතුපිටිය මහා විද්‍යාලය සහ බිංගිරිය මහා විද්‍යාලය ඇතුළු විදුහල් ගණනාවකම බාලදක්ෂ කණ්ඩායම් බිහිකිරීමෙහිලා පුරෝගාමීව කටයුතුකර ඇත.

1960දී බාලදක්ෂ ලී පදක්කම දිනා ගන්නා එතුමන් පසුව ක්‍රමානුකූලව පියවර තබමින් පුහුණු කිරීමේ නායක පාඨමාලාව සම්පූර්ණ කරමින් පුහුණු කිරීමේ නායකයකු බවට පත්ව ජාතික පුහුණු කිරීමේ කටයුතුවලදී තම දායකත්වය ඉහළින්ම ලබා දෙන ලදි.

ඩයස් ගුණරත්නයන් ශ්‍රී ලාංකේය බාලදක්ෂ අපට‍ විශේෂ වන්නේ එතුමන් අති දක්ෂ ලේඛකයකු සහ බාලදක්ෂ මාධ්‍යවේදියකු වූ නිසා ය. හෙළ භාෂාව පිළිබඳව විශිෂ්ට දැනුමක් සහ භාෂාව හැසිරවීමේ හැකියාවක් එතුමන් සතු වූ අතරම, ඉංග්‍රීසි භාෂාව නිසි පරිදි පිරිසුදුව භාවිත කළ විද්වතෙකි. ඉංග්‍රීසි ක්‍රමයට කටයුතු කෙරුණු එකල සිංහල භාෂාවෙන් පළවූ බාලදක්ෂ පොතපත ඉතාමත් විරල වූ යුගයක ඉංග්‍රීසි බසින් භාවිතයට ගැනුණු පොත් බොහෝමයක් එතුමන් අතින් සිංහලයට පරිවර්තනය විය. මානවක බාලදක්ෂ සංවිධානය හා පුහුණුව ( Rover Scout Organization and Training) මානවක බාලදක්ෂ ක්‍රියා මාර්ගය ( The Rover Plan )  වැනි කෘතීන් විශේෂ වන අතර, එමඟින් මානවක බාලදක්ෂ කටයුතු කෙරෙහි එතුමන්ගේ තිබූ උනන්දුව සහ දැනුම ද මනාව විද්‍යමාන විය.

ඩයස් මහතා අතින් 1948දී නිර්මාණය වූ ගිනිමැල සංදර්ශන තේමා ගීතය එයට ප්‍රබල නිදසුනකි. “ස්කවුටෝරාම ” (Scoutorama  වැනි එළිමහන් සංදර්ශන මෙහෙයවීමෙහිලා දැක් වූ දස්කම් කැපී පෙනුණු අතර, අදටත් එතුමන් සමඟ ඇසුරුකළ ප්‍රවීණයන් තම මතකය අවදි කරන්නේ මහත් ගෞරවයකිනි. බාලදක්ෂයන්ගේ හඬ ගුවන් ගත කිරීමේ පුරෝගාමීයා වූ එතුමන් 1965 වසරේ සිට ” බාලදක්ෂ හඬ” නමින් මුල්වරට ගුවන් විදුලි බාලදක්ෂ වැඩසටහනක් සම්පාදනය කර ඉදිරිපත්කර දේශීය සිංහල අසන්නන්ට හඳුන්වා දුන්නේය. එවන් විනෝදාත්මක සහ සාරවත් වැඩසටහනකට ශ්‍රී ලංකාවේ සෑම ප්‍රදේශයකින්ම පෝතකයන්, බාලදක්ෂයන් සහ මානවකයන් සහභාගි කරවා ගැනීම එකල කැපී පෙනිණි. මෙම බාලදක්ෂ හඬ වැඩසටහන පිළිබඳ ‘සියවසක උරුමය’ සඟරාවේ පවා සඳහන් වීමෙන් ගම්‍ය වන්නේ එහි ඇති ඓතිහාසික වැදගත්කම ය.

සැබවින්ම එතුමන් පරිණත බුද්ධියකින් යුත් මාධ්‍යවේදියෙකි. වසර ගණනාවක්ම ” ශ්‍රී ලංකා බාලදක්ෂයා ” නිල පුවත්පතේ ප්‍රධාන කර්තෘ වශයෙන් සහ ජාතික පුවත්පත්වල ලේඛකයකු වශයෙන් ද කටයුතුකර ඇත.

1965දී විලියම් ගොපල්ලව මහතාගෙන් ” දීර්ඝ සේවා” බාලදක්ෂ පලඳනාව, “විශිෂ්ට සේවා සහතිකය” සහ සේවා පදක්කම ලබා ගන්නා ලදි. 1986දී ජනාධිපති ජේ. ආර්. ජයවර්ධන මහතාගේ සුරතින් Bar to the Medal of Merit  ලබා ගත්තේ ය.

වෘත්තියෙන් විදුහල්පතිවරයකු වූ එතුමන් ඇල්පිටිය ශාන්ත තෙරේසා විදුහලෙන් තම සේවය අරඹා මග්ගොන චරිත ශෝධනාගාරය , දියලගොඩ රෝමානු කතෝලික විදුහල, පොතුපිටිය මහ විදුහල, හලාවත අඟුණවිල විදුහල, බිංගිරිය විදුහල, මොරටුව විල්ලෝරාවත්ත විදුහල, මොරටුව කටුකුරුන්ද විදුහල සහ විදුහල්පති තනතුරට උසස් කිරීමෙන් පසුව බුලන්කුලම මහ විදුහල, කඩලාන සාන්ත අන්තෝනි විදුහල සහ මොරටුව මෙතෝදිස්ත යන විදුහල්වල සේවයකර ඇත.

යහපත් සහ ආදර්ශවත් කිතුනුවකු වූ ඒ මහතා 1945 සිට 1995 දක්වා පුරා වසර 50ක් නොකඩවා රාගම තේවත්තේ අප ස්වාමිදුවගේ ජාතික බැසිලිකා සිද්ධස්ථානයේ වාර්ෂිකව පවත්වන රෝගීන් ආශීර්වාද ගැනවීමේ සන්ධ්‍යා මෙහෙයේ ප්‍රජා සේවයට තම නායකත්වයෙන් දියලගොඩ බාලදක්ෂ සමූහය මූලික කරගෙන සහභාගි කිරීම ප්‍රශංසනීය වේ. 1945දී මානවක බාලදක්ෂයකු ලෙස මුලින්ම සම්බන්ධ වී ඇති එතුමා 1998දී ජාතික මූලස්ථාන කොමසාරිස්වරයකු ලෙස මෙලොවින් සමුගත් මොහොත දක්වාම එම ප්‍රජා සේවයට දායක වී ඇත.

1974 වසරේදී ජාතික මූලස්ථාන කොමසාරිස්වරයකු ලෙස පත්ව 1998 ඔක්තෝබර් 14 වැනි දින ස්වර්ගස්ථ වන මොහොත තෙක්ම එම තනතුරේ 24 වසරක් කටයුතු කරමින් බාලදක්ෂ ව්‍යාපාරය වෙනුවෙන් අමිල මෙහෙවරක යෙදී ඇත.

ධර්මලාල් ගුණවර්ධන

බාලදක්ෂ ආචාර්ය

නාලන්දා විද්‍යාලය

කොළඹ

විදේශීය තොරතුරු

1. 2024 වසරේදී සාහිත්‍ය නොබෙල් ත්‍යාගය දිනුවේ කවුරුන් ද?

2. 2024 වසරේදී සාම නොබෙල් ත්‍යාගය දිනුවේ කවුරුන් ද?

3. 2024 වසරේදී වෛද්‍ය විද්‍යා නොබෙල් ත්‍යාගය දිනුවේ කවුරුන් ද?

4. 2024 වසරේදී භෞතික විද්‍යා නොබෙල් ත්‍යාගය දිනුවේ කවුරුන් ද?

5. 2024 වසරේදී ආර්ථික විද්‍යා නොබෙල් ත්‍යාගය දිනුවේ කවුරුන් ද?

6. 2024 වසරේදී රසායන විද්‍යා නොබෙල් ත්‍යාගය දිනුවේ කවුරුන් ද?

7. ලෝකයේ සාමය ඇති කරන සංවිධානය කුමක් ද?

8. කොරින්ත් ඇළ ඇත්තේ කුමන රටක ද?

9. පැනමා ඇළ ඇත්තේ කුමන රටක ද?

10. එඥතතචදඤ ඛ්චදචත ඇළ ඇත්තේ කුමන රටක ද?

11. කැලිඩෝනියානු ඇළ ඇත්තේ කුමන රටක ද?

12. ග්‍රෑන්ඩ් කැනල් ඇත්තේ කුමන රටක ද?

13. ඊරි විල ඇත්තේ කුමන රටක ද?

14. සූවස් ඇළ ඇත්තේ කුමන රටක ද?

15. බෙලොමොරෝ බෝල්ටිස්කි ඇළ ඇත්තේ කුමන රටක ද?

16. එක්සත් ජාතීන්ගේ සංවිධානය ආරම්භ කළේ කුමන අවුරුද්දක ද?

17. එක්සත් ජාතීන්ගේ සංවිධානය ආරම්භ කළේ කුමන කාලයක ද?

18. එක්සත් ජාතීන්ගේ සංවිධානයේ මෙතෙක් පත් වී ඇති මහ ලේකම්වරුන් ගණන කොපමණ ද?

19. හොලන්ඩ් යන රට කුමක් ද?

20. කොන්ස්ටන්ටිනෝපෝල් යන නගරය කුමක් ද?

විද්‍යා තොරතුරු

1. බත්කූරන් ජල කීටයකු ලෙස අවුරුදු කොපමණ ජලයේ සිටී ද?

2. හිස්කබලේ අස්ථි ගණන කොපමණ ද?

3. කශේරුකාවේ අස්ථි ගණන කොපමණ ද?

4. හස්ත කූර්චයේ අස්ථි ගණන කොපමණ ද?

5. පර්වණයේ අස්ථි ගණන කොපමණ ද?

6. පත්ලේ අස්ථි ගණන කොපමණ ද?

7. ශරීරයේ දත් කොපමණ තිබේ ද?

8. ත්‍රීකාස්ථිය කශේරුකා කොපමණ යාවීමෙන් සෑදී තිබේ ද?

9. අනු ත්‍රීකාස්ථිය කශේරුකා කොපමණ යාවීමෙන් සෑදී තිබේ ද?

10. ජංගාස්ථිය පිහිටා ඇත්තේ කොහේ ද?

11 දණිස් කටුව සම්බන්ධ වන්නේ කුමකින් ද?

12. මිනිස් සිරුරේ ඝනකම වැඩි ම අස්ථිය කුමක් ද?

13. අල්ලේ අතුල් ඇට කොපමණ තිබේ ද?

14. අංශ ඵලකයේ හැඩය කුමක් ද?

15. මැලේරියා ක්ෂුද්‍ර ජීවියාගේ නම කුමක් ද?

16. මැලේරියා වැලඳෙන්නේ කෙසේ ද?

17. ඩෙංගු වැලඳෙන්නේ කෙසේ ද?

18. කොලරා ක්ෂුද්‍ර ජීවියාගේ නම කුමක් ද?

දේශීය තොරතුරු

1. පිදුරුතලාගල කන්දේ උස කොපමණ ද?

2. ශ්‍රී ලංකාවේ තැනිතලා කොපමණ තිබේ ද?

3. වෙරළබඩ තැනිතලාව මුහුදු මට්ටමේ සිට මීටර් කොපමණ උස ද?

4. අභ්‍යන්තර තැනිතලාව මුහුදු මට්ටමේ සිට මීටර් කොපමණ උස ද?

5. මධ්‍යම තැනිතලාව මුහුදු මට්ටමේ සිට මීටර් කොපමණ උස ද?

6. ශ්‍රී ලංකාවේ සමාන්තර හෙල්වැටියක් වන්නේ කුමක් ද?

7. ශ්‍රී ලංකාවේ ශේෂ කන්දක් වන්නේ කුමක් ද?

8. මධ්‍යම කඳුකරයේ කඳුවැටි කොපමණ තිබේ ද?

9. මධ්‍යම කඳුකරයේ කඳු පන්ති කොපමණ තිබේ ද?

10. ශ්‍රී ලංකාවේ ප්‍රතිශතයක් ලෙස වියළි කලාපයේ ගංගා කොපමණ ද?

11. උෂ්ණත්වය වැඩිම පළාත කුමක් ද?

12. උෂ්ණත්වය අඩුම පළාත කුමක් ද?

13. ශ්‍රී ලංකාවේ වර්ෂාපතනය අඩුම දිස්ත්‍රික්කය කුමක් ද?

14. කඳුකර තෙත් කලාපයේ ගසක උස කොපමණ ද?

15. අතරමැදි සදාහරිත වනාන්තරයේ ගසක උස කොපමණ ද?

16. පහතරට තෙත් කලාපීය වනාන්තරයක ගසක උස කොපමණ ද?

17. පහතරට වියළි මිශ්‍ර වනාන්තරයක ගසක උස කොපමණ ද?

18. මහනුවර දිස්ත්‍රික්කයේ ජන ඝනත්වය කොපමණ ද?

19. හම්බන්තොට දිස්ත්‍රික්කයේ ජන ඝනත්වය කොපමණ ද?

20. මොනරාගල දිස්ත්‍රික්කයේ ජන ඝනත්වය කොපමණ ද?

කලා තොරතුරු

1. අවලස්සන තාරාවා රචනා කළේ කවුරුන් ද?

2. නයිටිංගේල් රචනා කළේ කවුරුන් ද?

3. රතු රෝස මල කෙටිකතා සංග්‍රහය රචනා කළේ කවුරුන් ද?

4. අපේ විත්ති රචනා කළේ කවුරුන් ද?

5. බැද්දේගම රචනා කළේ කවුරුන් ද?

6. බැද්දේගම සිංහලයට පරිවර්තනය කළේ කවුරුන් ද?

7. අපොයියාව කෘතිය රචනා කළේ කවුද?

8. පුංචි පැලේ ගස වෙනා රචනා කළේ කවුරුන් ද?

9. බැද්දේගම පොතෙහි ඉංග්‍රීසි නාමය කුමක් ද?

10. The chronicles of Narnia  රචනා කළේ කවුරුන් ද?

11. Wonder  නවකතාව රචනා කළේ කවුරුන් ද?

12. Harry Potter නවකතා සංග්‍රහය රචනා කළේ කවුරුන් ද?

13. පියසමර රචනා කළේ කවුරුන් ද?

14. ඩේවිඩ් පිළිමය සෑදුවේ කවුරුන් ද?

15. පියේටා පිළිමය සෑදුවේ කවුරුන් ද?

16. මළගිය ඇත්තෝ රචනා කළේ කවුරුන් ද?

17. මහාසාර පලඳනාව රචනා කළේ කවුරුන් ද?

18. සුභාෂිතය රචනා කළේ කවුරුන් ද?

19. සිරිත් මල්දම රචනා කළේ කවුරුන් ද?

20. සිංහල සිරිත් විරිත් පොත රචනා කළේ කවුරුන් ද?

නව සොයාගැනීම්

1. විදුලි බලය සොයා ගත්තේ කවුරුන් ද?

2. විදුලිය බලය සොයා ගත්තේ කුමන අවුරුද්දක ද?

3. නොබෙල් ත්‍යාගය නිර්මාතෘ කවුරුන් ද?

4. නොබෙල් ත්‍යාගය ඇරැඹුවේ කුමන අවුරුද්දක ද?

5. කඩදාසි සොයා ගත්තේ කවුරුන් ද?

6. කඩදාසි සොයා ගත්තේ කුමන අවුරුද්දක ද?

7. රබර් මකනය යුරෝපයට පළමුවරට හඳුන්වා දුන්නේ කවුරුන් ද?

8. මකනය සොයා ගත්තේ කුමන අවුරුද්දක ද?

9. බ්‍රේල් මුද්‍රණ යන්ත්‍රය සොයා ගත්තේ කවුරුන් ද?

10. බ්‍රේල් මුද්‍රණ යන්ත්‍රය සොයා ගත්තේ කුමන අවුරුද්දක ද?

11. වර්තමාන කැලැන්ඩරය සොයා ගත්තේ කවුරුන් ද?

12. වර්තමාන කැලැන්ඩරය සොයා ගත්තේ කුමන සියවසක ද?

13. පළමු කැලැන්ඩරය සොයා ගත්තේ කවුරුන් ද?

14. පළමු කැලැන්ඩරය සොයා ගත්තේ කුමන සියවසක ද?

15. පිහි‍ය සොයා ගත්තේ කවුරුන් ද?

16. පිහිය සොයා ගත්තේ අවුරුදු කීයකට පෙර ද?

17. ගින්දර සොයා ගත්තේ කවුරුන් ද?

18. ගින්දර සොයා ගත්තේ කුමන සියවසක ද?

දේශීය තොරතුරු – පිළිතුරු

1. මීටර් 2, 524.

2. 3

3. මීටර් 30

4. මීටර් 30 සිට මීටර් 300

5. මීටර් 300ට වැඩි

6. රක්වාන කඳු හා බලුතොට හෙල්

7. කතරගම, මිහින්තලය, සීගිරිය, රිටිගල, ගෝවින්දහෙල

8. 4

9. 5

10. 80%

11. උතුරු පළාත

12. මධ්‍යම පළාත

13. හම්බන්තොට

14. 8m-10m

15. 10m-25m

16. 30m-40m

17. 20m-30m

18. 664 km²

19. 210 km²

20. 72 km²
විදේශීය තොරතුරු- පිළිතුරු

1. හැන් කාන්

2. නිහෝන් හිඩන්කියෝ සංවිධානය

3. විද්‍යාඥ වික්ටර් ඇම්බ්‍රෝස් සහ විද්‍යාඥ ගැරී රෆ්කන්

4. ජෝන්. ජේ. හොප්ෆීල්ඩ් සහ ජෙෆරි ඊ. හින්ටන්

5. ඩේරියන් ආසේමෝගුලූස්, සයිමන් ජොන්සන් සහ ජේම්ස්. ඒ. රොබින්සන්

6. ඩේවිඩ් බේකර්, ජෝන් ජම්පර් සහ ඩෙමිස් හසාබිස්

7. එක්සත් ජාතීන්ගේ සංවිධානය

8. ග්‍රීසියේ

9. පැනමාවේ

10. කැනඩාවේ

11. ස්කොට්ලන්තයේ

12. අමෙරිකා එක්සත් ජනපදයේ

13. උතුරු අමෙරිකාවේ

14. ඊජිප්තුවේ

15. රුසියාවේ

16. 1945 වසරේදී

17. දෙවැනි ලෝක යුද්ධ සමයේ දී

18. 9

19. නෙදර්ලන්තය

20. ඉස්තාන්බුල්

කලා තොරතුරු – පිළිතුරු

1. හාන්ස් ක්‍රිස්ටියන් ඇන්ඩර්සන්

2. හාන්ස් ක්‍රිස්ටියන් ඇන්ඩර්සන්

3. ගුණදාස අමරසේකර මහතා

4. මාර්ටින් වික්‍රමසිංහ මහතා

5. ලෙනාඩ් වුල්ෆ්

6. ඒ. පී. ගුණරත්න

7. මහින්ද ප්‍රසාද් මස්ඉඹුල

8. කේ. ජයතිලක මහතා

9. The village in the jungle

10. සී. එස්. ලෙවිස්

11. අ.බ්. ර්‍ථචතචජඪධ

12. ජේ. කේ . රෝලිං

13. කුමාරතුංග මුනිදාස මහතා

14. මයිකල් ආන්ජලෝ

15. මයිකල් ආන්ජලෝ

16. මහාචාර්ය එදිරිවීර සරච්චන්ද්‍ර

17. මහාචාර්ය එදිරිවීර සරච්චන්ද්‍ර

18. අලගියවන්න මුකවැටිතුමා

19. ඇම්.ඇල්. සිල්වා ගරු මුහන්දිරම්තුමා

20. ආනන්ද එස්. තිලකරත්න

විද්‍යා තොරතුරු – පිළිතුරු

11. 5කි.

2. 22කි.

3. 26කි.

4. 8කි.

5. 14කි.

6. 5කි.

7. 32කි.

8. 5කි.

9. 4කි.

10. දණිස්සත් වළලුකරත් අතර

11. කාටිලේජයකින්

12. ඌර්වස්ථිය

13. 5කි.

14. ත්‍රිකෝණාකාර අස්ථියකි

15.Plasmodiu

16. මදුරුවාගෙන්

17. මදුරුවාගෙන්

18. Vibrio Colerae

නව සොයා ගැනීම්

1. බෙන්ජමින් ෆ්‍රෑන්ක්ලින්

2. 1752

3. ඇල්ෆ්‍රඩ් නොබෙල්

4. 1833

5. චීන ජාතිකයන්

6. ක්‍රි.ව. 105

7. එඩ්වර්ඩ් නෙයර්න් (Edward Nairne)

8. 1770

9. ලුවී බ්‍රේල් (Louis Braille)

10. 1824

11. ජූලියස් සීසර් (Julius Caesar)

12. ක්‍රි. පූ. 46

13. බැබිලෝනියානුවෝ (Babylonians)

14. ක්‍රි.පූ. 500

15. හෝමෝ සේපියන්

16. අවුරුදු මිලියන 2.5කට පෙර

17. හෝමෝ ඉරෙක්ටස්

18. අවුරුදු මිලියන 2කට පෙර

අකීෆ් අහමඩ්

වැස්ස වැස්ස මහා වැස්ස

ගස් වැල් පුබුදුවන වැස්ස

බිමට ඇවිත් පොළොවේ වැටී

ගංගාවට වැටෙන වැස්ස

පුංචි දුවේ පුතේ, මේ දිනවල ඇද හැලෙන වැස්ස නිසා බොහෝ දෙනා අපහසුවට පත්වෙලා තිබෙනවා. මහා මාර්ග යට වෙලා. සමහර අය නිවෙස්වලින් එළියට යන්නෙවත් නැතිව ඉන්නවා. සමහර අයට තම තමන්ගේ ව්‍යාපාර කරගන්නවත් බැහැ. ඒත් දුවේ පුතේ, වැස්ස කියලා අප කළ යුතු කාර්යයන් නවත්වලා ගෙදරට වෙලා ඉන්න එක නම් එතරම් හොඳ දෙයක් නොවේ. මේ නිසා කම්මැළි නොවී පුංචි ඔබත් එදිනෙදා වැඩ කටයුතු කළහොත් ඔයත් ජයග්‍රාහී දරුවකු වේවි. ඉතින් දුවේ පුතේ, අපි ඔබට කියන්න සූදානම් වන්නේ වර්තමානයේදී නොනවත්වා වහින වැස්ස පිළිබඳ කතාවයි.

ශ්‍රී ලංකාවට වැසි ලැබෙන ක්‍රම

සංවහන වර්ෂාව, මෝසම්වලින් ලැබෙන වර්ෂාව, වාසුළි මඟින් ලැබෙන වර්ෂාව ලෙස මෙය මූලික වශයෙන් කොටස්වලට වෙන්කර හඳුනාගත හැකි ය. මෙහිදී මෝසම්වලින් වර්ෂාව ලැබෙන ආකාරය ක්‍රම දෙකකට වෙන්කර නැවතත් අපට හඳුනාගත හැකි ය. එයින් ප්‍රථම ක්‍රමය වන්නේ නිරිතදිග මෝසම් සුළඟින් ලැබෙන වර්ෂාවයි. දෙවැනි ක්‍රමය වන්නේ ඊසානදිග මෝසමින් ලැබෙන වර්ෂාවයි.

සංවහන වර්ෂාව

ශ්‍රී ලංකාවට වැසි ලැබෙන ක්‍රම අතරින් ඉතා සුලබවම වර්ෂාව ලැබෙන ක්‍රමය වන්නේ සංවහන ක්‍රමයයි. එම ක්‍රමය මඟින් වර්ෂයේ මුළුල්ලේම වැසි ලැබේ. එහෙත් මෝසම් සහ වාසුළි මඟින් වර්ෂාව ලැබෙන්නේ වසරේ මාස කිහිපයකදී පමණි. එහෙත් තද අව් රශ්මිය ඇති දහවල් කාලවලදී සවස් භාගයේදී සංවහන වැසි බලාපොරොත්තුවීමට ඇති ඉඩ ප්‍රස්තාව වැඩි ය.

මෝසම් වැසි

මෝසම් වැසි ලැබීම එක්තරා කාලයකදී සිදු වන අතර, මැයි සිට සැප්තැම්බර් දක්වා නිරිතදිග මෝසමින් වැසි ලැබේ. දෙසැම්බර් සිට පෙබරවාරි දක්වා ඊසානදිග මෝසමින් වර්ෂාව ලැබේ. නිරිතදිග මෝසමින් ලැබෙන වර්ෂාවෙන් අධික වැසි ප්‍රමාණයක් ලැබෙන අතර, එම වර්ෂාව නොනවත්වා ඇද හැලෙයි. මෙයින් ලැබෙන වැසි දිය නිසා ගම් බිම්වලට බොහෝ අලාභහානි සිදු වේ. මෙයින් ලැබෙන වැසි අධික වීමට හේතුවක් වන්නේ, මේ වැස්ස ගෙනෙන නිරිතදිග මෝසම් සුළඟ ඉන්දියන් සාගරය ඔස්සේ පැමිණීමයි. එහෙත් ඊසානදිග මෝසමින් අඩු වැසි ප්‍රමාණයක් ගෙන එනු ලබන්නේ, ඊසානදිග මෝසම ගොඩබිමක් ඔස්සේ පැමිණීම හේතුවෙන් ය.

නිරිතදිග මෝසමින් වැසි ලැබෙන ප්‍රදේශ

නිරිතදිග මෝසමින් වැසි ලැබෙන්නේ මධ්‍යම කඳුකරයේ බටහිර බෑවුමටයි. බටහිර බෑවුමේ ඇති උස් බිම්වලට ලැබෙන මේ වර්ෂාව නිසා කඳුකරයේ ඇති ජල පෝෂිත ප්‍රදේශ තවත් පෝෂණය වේ. මේ හේතුවෙන් එම ප්‍රදේශවල ඇති දිය ඇලි වඩාත් සක්‍රීය වී වේගයෙන් ඇද හැලෙයි. එම දිය ඇලි ආශ්‍රිතව ඇති ගංගා ද වඩාත් පෝෂණය වෙමින් උතුරා යෑමට පටන් ගනියි. මා ඔය, අත්තනගලු ඔය, කැලණි ගඟ, කළු ගඟ යන ගංගා ද මෙලෙස වැසි ජලය ලැබී පෝෂණය වන ගංගා ය.

ඊසානදිග මෝසමින් වැසි ලැබෙන ප්‍රදේශ

ඉන්දියාවේ සිට හමන වියළි ශීත සුළඟ මඟින් දිවයිනේ බොහෝ ප්‍රදේශවලට වැසි ලැබේ. එහෙත් මේ කාලයේදී අහස වලාකුළුවලින් රහිත අතර, හිරු එළිය දීප්තිමත් ය. එහෙත් රාත්‍රි කාලය සිසිල් ය. මේ කාලයේදී වැඩි වර්ෂාපතනයක් ලැබෙන්නේ කඳුකරයේ ඊසානදිග බෑවුම් ප්‍රදේශයටයි. ශ්‍රී ලංකාවට වැසි ලැබෙන සමස්ත පිළිබඳ සැලකිලිමත් වුවහොත්, සාපේක්ෂව අඩු වර්ෂාපතනයක් ලැබෙන්නේ ඊසානදිග මෝසමින් ය.

වාසුළි වැසි

මෙරටට ලැබෙන වාසුළි වැඩි වශයෙන් ඇති වන්නේ බෙංගාල බොක්ක ප්‍රදේශයේ ය. මේ වර්ෂාව ප්‍රබලවම ක්‍රියාත්මක වන්නේ නොවැම්බර් හා දෙසැම්බර් මාසවල ය. මෙම වර්ෂාව අවුරුද්දේ ඕනෑම කාලයකදී ලැබිය හැකි ය. මේ වර්ෂාව වැඩි වශයෙන් ලැබෙන්නේ ශ්‍රී ලංකාවේ උතුරු හා නැඟෙනහිර ප්‍රදේශවලට ය. නැඟෙනහිර වෙරළින් රටට පැමිණෙන මෙය පිටව යන්නේ වයඹදිග වෙරළින් ය. වාසුළි වර්ෂාව ලැබෙන අවස්ථාවලදී මෙරට පුරා වැසි ඇති වේ. මෝසම් සුළඟින් වර්ෂාව ඇති වන කාලයේදී වාසුළි වර්ෂාව ද ලැබේ. සුළඟේ තීව්‍රතාව අනුව වායු කැලඹීම, අවපාතය, සුළං කුණාටු ආදී නම්වලින් මේ වර්ෂාව හඳුන්වයි.

වැසි වැස්සොත් පරිසරයට ඉක්මනින්ම හානි වීමට හේතුව

වැසිවලින් පරිසරයට සිදු වන හානි වැඩි වන්නේ මිනිසා විසින්ම කළ මිනිස් ක්‍රියාකාරකම්වලින් යැයි කිවහොත් නිවැරැදි ය. මේ නිසා පුතේ දුවේ, කුඩා කාලයේ සිටම අප, අපගේ පරිසරය සුරක්ෂිත කිරීමට කටයුතු කළ යුතු ය. උදාහරණ ලෙස වැසි දිය නිසා මං මාවත් යට වී යන්නේ කානු පද්ධතිවල ඇති අවහිරතා නිසා ය. කානු පද්ධතිය අවහිර වන්නේ ඇයි දැයි ඔබ මඳක් සිතුවා ද? නැහැ නේද? කානු පද්ධති අවහිර වන්නේ මිනිසා නොසිතාම පරිසරයට මුදා හරින කැළි කසළ හේතුවෙන් ය. මේ කැළි කසළ ගොස් කානු පද්ධතිවල හිරවීම නිසා වැසි අවස්ථාවලදී මං මාවත් ජලයෙන් පිරී යයි. මේ නිසා පුතේ දුවේ, කැළි කසළ පරිසර පද්ධතියට මුදා හැරීමට පෙර කල්පනාකාරී වන්න. නැතිනම් එහි පසු හානිය වන්නේ ද අපටම ය. මේ නිසා කුඩා කාලයේ සිටම කැළි කසළ පරිසරයට මුදා හැරීමේදී සැලකිලිමත් වන්න.

වැස්සෙන් ඇති වන අධික හානිය වළක්වන්නේ කෙසේද?

වැස්සෙන් සිදු වන අධික හානිය වැළක්වීමට ක්‍රම දෙකක් තිබේ. මින් පළමු වැනි ක්‍රමය නම් විධිමත් කානු පද්ධතියක් තිබීමයි. දෙවැන්න නම් කැළි කසළ මුදා හැරීමේදී නිවැරැදි ස්ථානවලට මුදා හැරීමයි. මේ ක්‍රම දෙක නිසි ලෙස අවබෝධ කරගෙන, ඒ අනුව ක්‍රියා කළහොත් වර්ෂා අවස්ථාවක ඉක්මනින්ම මං මාවත් ජලයෙන් පිරී යෑම වළක්වා ගත හැකි ය.

මේ නිසා කුඩා කාලයේදීම කැළි කසළ නිසි ස්ථානවල ස්ථාන ගත කිරීමට කුඩා කාලයේදී සිටම ඔබත් පුරුදු වන්න. එසේ නොකළහොත් මං මාවත් පමණක් නොව පහත් බිම්වල ඇති කුඩා නිවාස ද ජලයෙන් යටවීමේ ප්‍රවණතාවක් ඇති වේ.

අධික වර්ෂාව නිසා ගස් වැල්වලට ඇති වන හානි

අධික වර්ෂාව නිසා ගස් වැල්වලට ද හානි සිදු වේ. එමෙන්ම පාංශු ඛාදනය ද අධිකව සිදු වේ. රූස්ස ගස් පවා බිමට කඩාගෙන වැටෙයි. පොළොව අභ්‍යන්තරයට නොගිය මුල් ඇති නිසා මෙම තත්ත්වය උදා වෙයි. මේ නිසා පැළ සිටුවීමේදී ගැඹුරට වළවල් කපා සිටුවීමට අප මතක තබා ගත යුතුයි. නැති නම් එම ගස් විශාල වීමේදී කුඩා වර්ෂාවකින් වුවත් එම ගස කඩා වැටීමට හේතුවක් වේ. මේ බව ගොවියන් මෙන්ම සාමාන්‍ය වගාකරුවන් ද පාසල් ශිෂ්‍ය ශිෂ්‍යාවන් වන ඔබ ද මතක තබා ගත යුතුයි.

රූපාන්ති බුලත්සිංහල

හ/රන්න වාඩියගොඩ කනිෂ්ඨ විද්‍යාලයේ
විදුහල්පති
සී. කේ. ඩබ්ලිව්. රත්නායක මහතා
ඕනෑම දරුවකුට බාධක අභියෝග තිබේ. මේ බාධක අභියෝග පිළිබඳ කිසිවක් අභියෝගයක් ලෙස පිළිනොගෙන ඉදිරියටම යෑම ශිෂ්‍යයකුගේ මූලික අරමුණ විය යුතුයි. ආර්ථික බාධක, කම්මැළි වීම, රෝග, මේ කිසිවක් බාධකයක් ලෙස පිළිගතහොත්, ශිෂ්‍යයකුට ඉදිරියට යෑමට ඇති ඉඩ ප්‍රස්තාව අවහිර වේ. මේ නිසා සෑම දරුවකුවම උනන්දුවෙන් උත්සාහයෙන් වැඩ කළ යුතුයි. උත්සාහය උනන්දුව බොහෝ ජයග්‍රහණවලට ඉවහල් වේ. එලෙස උත්සාහයෙන් ඉදිරියට යන පාසලක් පිළිබඳ කියන්නයි මේ සූදානම් වන්නේ. ඉතින් ආදරණීය පුතේ දුවේ, එයින් ඔබටත් ගත හැකි ආදර්ශයක් තිබේ නම් ඒ ගැන සැලකිලිමත් වීමෙන් ඔබටත් ජයග්‍රහණයට පිවිසීමට හැකි වේ. ඒ අයුරින් ජයග්‍රහණයට යන හ/ රන්න වාඩියගොඩ කනිෂ්ඨ විද්‍යාලයේ විදුහල්පති සී. කේ. ඩබ්ලිව්. රත්නායක මහතා ඔබට කියන කතාව අසමු.

” අපේ පාසල ආරම්භ වී තිබෙන්නේ 1963 වර්ෂයේදීයි. ඒ කාලයේ පාසල ආරම්භ වෙලා තිබෙන්නේ ළමයින් තුන්දෙනකුගෙන් කියලායි කියන්නේ. ඉතා කුඩාවට ආරම්භ වී තිබෙන මේ පාසල අද යම්කිසි ප්‍රගතියක් ලබා තියෙනවා කියලා තමයි මම හිතන්නේ. මේ වන විට මේ පාසලේ තිබෙන්නේ පළමු ශ්‍රේණියේ සිට 11 ශ්‍රේණිය දක්වායි. ඒ වගේම අපේ පාසලේ ළමයින් එකසිය හැට පහක් පමණ සිටිනවා. ගුරුවරු සිටින්නේ විසි ගණනක් විතර ප්‍රමාණයක්. සෑම දරුවකුම ක්‍රියාශීලිව අධ්‍යාපනයට යොමු කිරීම අපේ පාසලේ ගුරුවරුන්ගේ අරමුණයි. මේ අරමුණ වෙනුවෙන් සෑම විටම දරුවන් හැඩ ගැස්වීම ගුරුවරුන්ගේ අභිලාෂයයි.”

” මේ නිසා මේ වෙනුවෙන්ම ඇපකැප වී ගුරුවරුන් වැඩ කරනවා. අපේ පාසලේ සිසුන් අධ්‍යාපනය මෙන්ම අනෙකුත් ක්‍රියාකාරකම් ද සමබරව කරගෙන යනවා. ක්‍රීඩා, සංගීතය, වැනි අංශවලින් ද දක්ෂ දරුවන් ඉන්නවා. ඒ අය ඒ අංශවලින් ද ඉදිරියට යෑමට හරිම උනන්දුයි. ඒත් පාසලේ වැඩ කිසිවිටකත් අතපසු කරගන්නේ නැහැ. මෙවර අපේ පාසලේ සාමාන්‍ය පෙළ ප්‍රතිඵල සියයට අසූ දෙකක් විතර වෙනවා. ඒක අපේ පාසලට ගෞරවයක්. ඒ වගේම අපේ පාසලේ දරුවන් ශිෂ්‍යත්ව විභාගයෙනුත් සමත් වෙනවා. කෙතරම් ආර්ථික දුෂ්කරතා තිබුණත් දරුවන් අධ්‍යාපන කටයුතුවල නිරත වෙන්න උනන්දුයි.”

” අපේ පාසලේ දරුවන්ගේ මව්පියන් වැඩි වශයෙන්ම නිරත වන්නේ වඩු කර්මාන්තයේ. නිවාඩු වෙලාවට දරුවන් ඒ කර්මාන්ත කෙරෙහි ද යොමු වෙනවා. වෘත්තීය පුහුණුව කියන්නෙත් දරුවන්ට වැදගත් දෙයක්. එනිසා තමයි අපි ඊට අවසර දීලා තියෙන්නේ. ඇත්තටම පිළිගත හැකි තත්ත්වයක වෘත්තීය පුහුණුවක් සෑම පාසලකම ඇති කරන්න පුළුවන් නම් ඒක ගොඩක් වටිනවා. අපේ පාසලේ දරුවනුත් එවැනි වෘත්තීය පුහුණුවකට යොමු කරන්න අපි උත්සාහ දරනවා. ඒ සඳහා ඉදිරියේදි වැඩපිළිවෙළක් යොදන්නත් අපි සූදානම්. ඕනෑම වෘත්තියකට පිවිසෙන්න පෙර දරුවකු දැනුමෙන් සන්නද්ධ වීම ඉතා වටිනවා. ඒකයි අපි මෙතරම්ම උත්සාහ කරන්නේ. මේ උත්සාහයට දරුවන්ගේ මෙන්ම මව්පියන්ගෙ සහයෝගයත් අපට ලැබෙනවා. මම හිතන්නේ ගුරුවරුන්ට කරන්න පුළුවන් එක කොටසක් විතරයි.”

”2023, 2024 වර්ෂවලදී වොලිබෝල්වලින් අපේ පාසල ඉදිරියට පැමිණියා. එකවරක් අනුග්‍රාහක ආයතනයක් සංවිධානය කළ තරගාවලියකින් අපේ පාසල තෙවැනි ස්ථානයට පැමිණියා. මේ අවස්ථාව අපේ පාසලට ලැබීම පිළිබඳ මට ලොකු සතුටක් දැනෙනවා. දරුවන් අධ්‍යාපනයට පමණක් සීමා කිරීමෙන් සමබර මිනිසකු බිහි කරන්න බැහැ. මේ නිසා ක්‍රීඩාව, සංගීතය, නැටුම් වැනි අංශ කෙරෙහි ද දරුවන් යොමු කිරීම ඉතා වැදගත් වෙනවා. කර්තව්‍ය උපරිමයෙන් කරන්න පාසලක් විදිහට අපි සෑම විටම උත්සාහ කරනවා.”

මේ ආකාරයට කැපවීමෙන් කටයුතු කිරීමට එතුමාට තව තවත් ශක්තිය ධෛර්යය ලැබේවා යැයි අපි මිහිර වෙතින් සුබ පතමු.

රූපාන්ති බුලත්සිංහල

ඡායාරූප- පාසලේ ඡායාරූප සංගමය

කොළ පාට යාළුවෝ

පාන්දර හතරට විතර පොළොව තෙමන්න පටන් ගත්ත අහස උදෑසන හිරු උදාවට පවා තහංචි දැමීය. හැබැයි ඒ තහංචිය වලංගු වුණු පුංචි ගැහැනු ළමයකුත් හිටියා. එළියෙන් ඇහෙන වැහි බිඳුවල හඬට කන්දෙන ගමන්ම මේ පුංචි ගැහැනු ළමයා ඇස්දෙක තවත් තද කරගත්තා.

“දෝණි නැඟිටින්න…” ඒ රෙහානාගේ මවගේ හඬ ය.

“මට බෑ…………”

“ආ………….එතකොට අද ඉස්කෝලෙ යන්නේ නැද්ද?”

“දන්නෙ නෑ”

“දන්නෙ නෑ………….කියන්නේ? කෝ……………

කෝ……………නැඟිටින්න ……..නැඟිටින්න”

“වහිනවා කියලා ඉස්කෝලෙ යන්නෙ නැතුව ගෙදර ඉඳලා හරියන්නේ නෑනේ. කම්මැළි වෙන්න එපා ළමයෝ……”

“අනේ! ……..මට බෑ…….”

අන්තිම මොහොත දක්වාම වාද කරමින් පරාජය භාර නොගත් රෙහානා කෙසේ හෝ අම්මාගෙන් එල්ල වූ වචන සියල්ලම සාර්ථක ලෙස බිඳ දමමින් තමාගේ ජයග්‍රහණය සලසා ගත්තා ය. පාසල් යෑමට කම්මැළි ළමයෙක් නොවුණත් රෙහානාට අද වැනි වැසි දිනයක පාසල් නොයා ගෙදර නතරවීමට සිත එකඟකරවා ගැනීමට තරම් ප්‍රබල හේතුවක් සිතේ ඉපිද තිබිණි.

“අම්මා……..අම්මා” රෙහානාගේ කටහඬ පෙරට වඩා ප්‍රාණවත් හා නැවුම් බවින් පිරී තිබිණි.

“ඇයි දැන් ඒ පාර මොකද?”

“නෑ………නෑ…..එහෙම ලොකු දෙයක් නෙවෙයි. මං වත්ත පහළට යනවා. හොයන්න එපා ටික වෙලාවක් යනකම් හොඳේ.”

“ආ..මං දැනගත්තා අද ගෙදර ඉන්නේ මොකක් හරි නාඩගමක් නටන්න තමා කියලා. ඔය කිව්වාට ආයෙ ඉතිං පැය දෙක තුනකට ආගිය අතක් නෑ කියලා මං දන්නවා.”

මව පවසද්දී රෙහානා, මවට සමච්චලයට මෙන් සිනහසෙන්නට විය.

“ඒ කියන්නේ අම්මට මගේ හිත කියවන්න පුළුවන් නේද? ඔන්න එහෙනම් මම ගියෝ……..ආ……..නෑ……..නෑ……මේ අහන්නකෝ අම්මට හොයාගන්නම බැරි වුණොත් මාව ගස් උඩත් චුට්ටක් බලන්න ”

අම්මා එයට පිළිතුරක් දීමට පෙර රෙහානා බත්කූරකුගේ වේගයෙන් තටු සලා ඉගිලී යන්නාක් මෙන් ගෙයින් එළියට පැන්නාය.

ඇය, ඇගේ වයසේ වෙනත් ළමයින්ට වඩා වෙනස්ම චරිතයක් විය. නාඳුනන පුද්ගලයන්ට පවා ඉතා හොඳින් දන්නා ලෙස සිනහවෙන් සංග්‍රහ කරන ඇය මිහිපිට සිටින ඉතාම කුඩා කුහුඹුවාගේ පටන් නිල්පාටින් වියන් බැඳි අහස දක්වාම ගෙතුණු ලොවටම පෙම් බැඳි දැරියකි. පරිසරයේ සියුම් සිදුවීම් පවා මහා පුදුමයක් ලෙස දැකීමට පුරුදුව සිටි ඇය ඉතා කුඩා වූ මොනරකුඩුම්බිය මලකින් පවා මහත් සන්තෝෂයකින් සිත පුරවා ගත්තා ය. සැමදා දකින ඉර දිනකට සැඟව ගොස් කළු වලා ගුවන සිසාරා පැල් බැඳගත් දවස් ඇයට දැනුණේ තමා වටා ඇත්තේ වෙනස්ම වූ ලෝකයක් ලෙස ය. දෙපාරක් නොසිතා ඒ වෙනස් ලෝකය හා අත්වැල් පටලා ගැනීමට සූක්ෂ්ම ලෙස තම මවගේ සිත තමාට රිසි අයුරින් මොළොක් කොට පාසල් නොයා සිටීමට කැමැති කරවා ගන්නා ලද්දේ වෙන කිසිවක් නිසා නොව තමා දකින ඒ වෙනස්ම ලොවට ආගන්තුකයකු නොවී ඒ වෙනස්කමෙන් සතුටක් ලැබීමේ අහිංසක සිතුවිල්ල පෙරදැරිව ය.

“අනේ දෙයියනේ….මගේ ඇස්වල මායා අඳුන්වත් ගෑවිලාද?” පුංචි රෙහානාගේ මනසේ ඉබේටම විවිධාකාරයේ සිතුවිලි පොරකන්නට පටන් ගත්තේ ය.

ඇයට සමාජයේ හමුවන විවිධ වූ පුද්ගලයන් හැරුණු කොට ඇයට කොළ පාට මිතුරන් රැසක් සිටි අතර, ඔවුන් කතා කළ භාෂාව අසාමාන්‍ය වූ බැවින්ම රෙහානාට ඔවුන් විශේෂ විය. ඇය නිතරම කොළපාට මිතුරන්ගේ කොළපාට පත්‍ර මත ඔවුන්ගේ භාෂාව ලියැවී තිබෙන ආකාරය දුටුවා ය. ඇය ඔවුන්ට සමීප වන්නට වන්නට කොළපාට මිතුරන් ද ඇයට ආදරය කරන්නට පටන් ගත්තේ ය. පුංචි රෙහානාට නිතරම සිතුණේ ගස් හුස්ම බෙදනවා නම් ගස් කතා කරනවා නම් තවදුරටත් ඒ සියල්ල අප්‍රාණවාචී නාම පද නොවන බව ය. ගස් අප්‍රාණවාචී නාම පදයක් ලෙස සිතීම සිංහල පොතට පමණක්ම සීමා කරන ලදි. ඇගේ විසුරුණු මනස විසින් ගස් අප්‍රාණවාචී යන තර්කය බිඳ දැමූ අතර, ඇය පිළිගත් එකම සත්‍ය නම් අපට ගස් කොළන් දැනෙනවා නම්, ඔවුන් හුස්ම බෙදනවා නම් ගස් හා අපි යන දෙකොට්ඨාසයම ප්‍රාණවාචී නාම පද බව ය.

රෙහානාගේ අත්තම්මා විසින් සිටුවන ලද විශාල වූ ඇට්ටේරියා ගසක් යටට දිව ගිය රෙහානාට දැනුණේ තමා සුරලොවක් මත පා තබන ලෙස ය.

“අනේ ඔයාලගේ ලස්සන බලන්න…මෙච්චර මල් ඔයාට කොහෙන්ද අනේ….ඒ විතරක්ද මේ සුවඳ… ඔයා නම් මායාකාරියක්ම තමයි. මේ බලන්න ඔයාගේ මල් පෙති උඩ පුංචි පුංචි පිනි යාළුවො ගොඩයි. ඔයාලා මෙච්චර වෙලා කොඳුරපු රහස් මටත් කියන්න හරිද………මාත් ආසයි ඒවා අහන්න. ඔන්න එහෙනම් මම බිම වැටුණ මලක් මගේ ඔළුවෙ ගහගන්නවා…මාත් දැන් ඔයා වගේ…….”

කහපාට බෝරිච්චි අත් අල්ලපු රැලි ගවුමට යට වාටියට සුදුපාට රේන්ද අල්ලා හැඩ වී තිබුණූ ගවුමක් ඇඳ ඇට්ටේරියා මල් දෝත පුරා ගෙන හිසෙහි එක පැත්තක ගහට මුවා වෙන්නට තමන් ඇට්ටේරියා මල් දෙක තුනකින් සැරසී ගත් ඒ සිනාමල ඇට්ටේරියා ගස වටා කැරකෙමින් අතොරක් නැති කතාවකට මුල පුරන්නට විය.

“මේ…….මේ…… මගේ අහංකාර ඇට්ටේරියා කුමාරි දන්නවද අද මම ඉස්කෝලෙ ගියෙත් නෑ.. ඒ ඔයාලව බලන්න ඕනේ නිසා. මගේ යාළුවන්ටත් පාළු ඇති මගේ කතා පෙට්ටිය අද එයාලා ගාව නැති නිසා. එයාලා හරි ආසයි මගේ කතාවලින් එයාලගේ කන් පුරවගන්න. තව දෙයක් තියෙනවා මට කියන්න මගේ කොළ පාට යාළුවො ගැන මුළු ලෝකයටම කියන්න ඕනේ” ඇය කිව්වා ය.

රොහන්සා නිසලනී

12 ශ්‍රේණිය

බණ්ඩාරනායක මධ්‍ය විද්‍යාලය

වේයන්ගොඩ

———————–

අපට නැතිවම බැරි එන්නත්

එන්නතක් යනු මිනිස් සිරුරේ ප්‍රතිශක්තිකරණය වැඩි දියුණු කරගැනීම පිණිස නිපදවූවකි. ඉංග්‍රීසි භාෂාවෙන් මචජජඪදඥ ලෙස හැඳීන්වීමට හේතුව එඩිවඩ් ජෙනර් විසින් ගව වසූරිය රෝගය සඳහා එන්නත්කරණයක් පළමු වතාවට සිදු කිරීමෙන් පසුව ය. එයට හේතුව ලතින් භාෂාවෙන් ගවයා වැකා ලෙස ද හැඳීන්වීමයි.

1796 වර්ෂයේදී එඩ්වඩ් ජෙනර් විසින් කරන ලද පරීක්ෂණවල ප්‍රතිඵලයක් ලෙස එන්නත්කරණය සොයාගෙන මිනිස් ජීවීත විශාල ප්‍රමාණයක් මරණයෙන් ගැලවීමේ මඟ සොයා ගැනීම වඩාත් පහසුවක් විය. ජෙනර් කරන ලද මෙම කාර්යය ලුවී පාස්චර් ඇතුළු වෛද්‍යවරු වැඩි දියුණු කළහ. එන්නත්කරණය පිළිබඳ වැඩි අවබෝධයක් කරන ලද්දේ චීන ජාතිකයන් විසින් ය. ලෝකයේ විවිධ ජාතීන් වැඩි දියුණු කළ එන්නත්කරණය ශ්‍රී ලංකාවට පැමිණියේ 1886 වසරේදී ය. මේ වසූරිය එන්නත ලබාදීමත් සමඟ ය. මේ වනවිට බැක්ටීරියා හා වයිරස් නිසා සෑදෙන රෝග බොහොමයක් වැල¼දීම වැලැක්විය හැකි එන්නත් වර්ග නිෂ්පාදනයකර තිබේ. 1974දී ප්‍රතිශක්තිකරණ වැඩසටහන එක්සත් ජාතීන්ගේ ළමා අරමුදල හා අනෙකුත් ආධාර දෙන සංවිධානවල සහාය ඇතිව ආරම්භකර තිබේ. මේ ආකාරයට එන්නත්කරණය පැමිණීම පුංචි අපට ද වාසිදායක වී ඇත.

නතාරි යසායුරි පනාගොඩ

9 ශ්‍රේණිය

බප/ පිළි/ධර්මසේන ආටිගල බාලිකා විද්‍යාලය

කැස්බෑව

————————————-

සොබාදහම සහ පුංචි අපි

සොබාදහම යනු කුමක්ද? ඔබ ඒ පිළිබඳ මඳක් හෝ සිතා බලා තිබේ ද? අනිවාර්යයෙන්ම ඔබ සිතා බලා ඇති. එහෙත් අපි දැන් ඒ පිළිබඳ කතා කරමු. සොබාදහම යනු අප අවට ඇති, මිනිසා ඇතුළු සියලු සතුන්ට පීවය සපයන අපේ මේ වටාපිටාවයි. මේ වටපිටාවේ සොඳුරු බව විඳගන්න පුංචි අපත් හුරු විය යුතුයි. සොබාදහම කියන්නේ අපූරු දායාදයක්. අපට බොහෝ දේ හිමි වෙලා තිබෙන්නේ සොබාදහම නිසායි. ජල උල්පත්, තුරුලතා මේ සෑම දෙයක්ම ලැබෙන්නේ සොබාදහම් මාතාව නිසායි. එනිසා අප මේ සෑම දෙයකටම කෘතවේදී වෙන්න මතක තබා ගත යුතුයි.

අද අපේ බොහෝ යහළුවන්ට මේ දේවල් අමතක වී තිබේ. ඒ අය හිතුමතේ ගස් වැල් කපා දමති. ඒ වගේම ඇළ දොළ අපිරිසුදුකර දැමීමට ඔවුහු පෙලඹෙති. දුර්ලභ සතා සිව්පාවට ද ඔවුන්ගේ ආරක්ෂාව සොයා ගැනීමට ද මේ නිසා අපහසු වේ. මේ නිසා වැඩිහිටියන් මෙන්ම පුංචි අපත් සොබාදහම ආරක්ෂා කළ යුත්තේ කෙසේද යන්න පිළිබඳ දැනුම්වත් විය යුතුයි. හරිත පැහැයෙන් බබළන හෙටක් නිර්මාණය කිරීමේ අරමුණින් අපි සියලුදෙනා එකාවන්ව කටයුතු කරමු.

කළිඳුනී අමරසිංහ

8 ශ්‍රේණිය

විශාඛා විද්‍යාලය,කොළඹ