ඔන්න දුවේ පුතේ, ඉස්සර කාලේ අබරා කියලා මිනිසෙක් හිටියා.මේ අබරාගේ හාමිනේ පෝය දවස්වලට අටසිල් සමාදන් වෙන්න පුරුදුවෙලා හිටියා. ඉතින් එක දවසක් මේ අබරාටත් සිල්ගන්න වුවමනා වුණා. ඒත් එයා කලින් සිල් අරන් නොතිබුණා නිසා ඒ ගැන මොනවත්දැනගෙන හිටියේ නැහැ. ඉතින් එයාට ඕන උනා සිල්ගන්න විදියදැනගන්න.එයා ඒ ගැන එයාගේ හාමිනේගෙන් ඇහුවා.
“ආ….හාමුදුරුවෝ කියන කියන වචනේ
තමනුත් කියන්න ඕනෙ…අබරාගේ
හාමිනේ කිවුවා.
ඉතිං ඔන්න දවස් ගත වෙලා ගිහින් පෝය දිනයත් ආවා. අබරා සුදු රෙද්දක් ඇදගෙන සුදු සළුවක් පොරවගෙන පන්සලට ගියා. ගිහින් හාමුදුරුවෝ ඉස්සරහා හිටගත්තා. හැබැයි හාමුදුරුවන්ටවැන්දේ නැහැ. ඉතිං අබරා දිහා ටික වෙලාවක් බලාගෙන හිටිය හාමුදුරුවෝ
“ආවේ මොකටදැයි..අබරාගෙන් ඇහුවා. එතකොටම අබරාගේ කටිනුත් පිට වුණේ මොනවද දන්නවද?
“ආවේ මොකටද? කියලා.
ඔන්න ආයෙත් සැරයක් හාමුදුරුවෝ ඇහුවා
“මොකද? උඹට පිස්සුද?
එතකොට අබරා කියනවා “මොකද? උඹට පිස්සුද? කියලා.
“ගනු කඹයක් මූ බැඳලා දාන්න…. කියලා හාමුදුරුවෝ තරහෙන් කිවුවා.
ඉන්පස්සේ අබරාත් කෝපයෙන් වගේ අර හාමුදුරුවන් කියපු වචන ටිකම කිවුවා. ඒත් ඒ වෙලාවෙම හාමුදුරුවන්ගේ අණ පරිදි ඇබිත්තයා ඇවිල්ලා අබරාට ගුටි බැට දීලා එළවා දැම්මා. වරක් හිස අත ගාමිනුත්, තවත් වරක් පිට අත ගාමිනුත්, තවත් විටෙක පපුව අත ගාමිනුත් ගාටමින් නිවෙස දෙසට එන තම ස්වාමියා දැකපු අබරාගේ හාමිනේ පුදුමයට පත්වුනා.
“ඇයි බොලා හැමදාම කොහොම සිල් ගන්නවාද? අද එක දවසේ සිල් ගන්ට ගිහින් මගේ ඇට ඔක්කොම පොඩි වුණා. සිල් ගැනිල්ලත් මහාම මහා භයානක වැඩක් නොවැ බැලින්නම්. .. අබරා කිවුවා.
ඉන්පස්සේ තමන්ට වෙච්ච ඇබැද්දිය හාමිනේ එක්ක මුල ඉදන් අගටම කිවුවා. තම ස්වාමියාගේ අනුවණකම ගැන කවදත් දැනගෙන හිටි අබරාගේ හාමිනේ තෙල් බෙහෙත් ගල්වා ඔහුට සාත්තු කළා.

ටිකක් දවස් යනකොට මේ කතාව ගම පුරාම පැතිරිලා ගියා. අබරාගේ හාමිනේගේ යෙහෙළියන්ගේ සරදම් වචන කොතෙකුත් ඉවසාගෙන ඉන්න බැරි වුණත් තම සැමියාගේ අනුවණකම ගැන සිතා ඔහුට අනුකම්පා කළා.ඒ විතරක් නෙමෙයි හාමුදුරුවන් ගැන ඇය බොහෝම කළ කිරුණා. එතැන් පටන් ඇය සිල් සමාදන් වීමට යන ගමනත් නතර කළා. තමන්ට නුහුරු නුපුරුදු දෙයක් කරන්න ගිහින් අමාරුවේ වැටෙන අය දැක්කම මේ පිරුළේ අපේ මතකයට එන්නේ නිරායාසයෙන්මයි.

සිතුමිණි රාජපක්ෂ

ජීවිතයට මිහිර ගෙනෙන සාහිත්‍යය

“සාහිත්‍යය” යන වචනය ඇසූ පමණින්ම එහි අරුත යම් කෙනකු නොදන්නවා විය හැකි ය. “සාහිත්‍යය” යන වචනය විසන්ධි වූ විට ‘ස + හිත්‍ය’ ලෙස වර නැඟේ. මෙහිදී ‘ස’ යනු සමීප හා සම්පූර්ණ යන අරුත් ගෙන දේ. ‘හිත්‍ය’ යනු හිත නැතහොත් මනස යන අරුත ගැබ් වෙයි. ඒ අනුව සාහිත්‍යය යනු, සහෘද මිනිසාගේ මනසට සමීප වී මනස සම්පූර්ණ කරන ගද්‍ය, පද්‍ය ආදී නිර්මාණ ලෙස විග්‍රහ කළ හැකි ය.

ඒ අනුව මිනිස් මනස සම්පූර්ණ කරන මෙම විවිධාකාර නිර්මාණ ඔස්සේ එහි රසය විඳගැනීම වූ කලී, ‘සාහිත්‍යය + රස + ආස්වාදය’ හෙවත් *සාහිත්‍ය රසාස්වාදය* නම් වේ.

මානවයාගේ ආස්වාදය උදෙසාම පවතින මෙම සාහිත්‍ය නිර්මාණ විටෙක මානසික ක්‍රියාවලියක් ලෙස හට ගන්නා චමත්කාර වූ විපර්යාසයක මහා පෙරළියක් වන අතර, තවත් විටෙක අප සිත් ආනන්දයෙන් ප්‍රඥාව කරා ගෙන යෑමකි. ගද්‍ය, පද්‍ය, නාට්‍ය, කෙටිකතා, නවකතා, නිසැඳැස් හා සිනමා යන සාහිත්‍යාංගයන්හිදී යෙදෙන වචන හා යෙදුම් ඒ ආකාරයෙන්ම වටහාගැනීමට අපහස ුය. “දිසි අරුත” හෙවත් පිටතට පෙනෙන අරුතක් නොමැති කලාවක් ද, “වැසි අරුත” හෙවත් සැඟවී ඇති අර්ථයක් ද වූ කලාවක් මෙහි පෙන්නුම් කිරීම විශේෂම ගුණාංගයකි. එයින් සහෘදයාගේ සිතීමේ ශක්තියට ඉඩහසර සලසා දෙයි. මෙම විශේෂ නිර්මාණයන්හි රසවිඳගැනීම, එම නිර්මාණය බිහි කිරීමටත් වඩා අපහසු කාර්යයක් බව හා ඉතා වටිනා බවත් මහාකවි පැරකුම්බාවන් අතිශයෝක්තියෙන් පැහැදිලිකර තිබේ. විශිෂ්ට සාහිත්‍යය නිර්මාණකරුවකු බිහිවීමට නම් සිංහල භාෂාව හා සාහිත්‍යය පිළිබඳ මනා දැනුමක් ප්‍රගුණ කළ අයකු විය යුතු ය.

සත්ත්ව ලෝකය තුළ රසාස්වාදයක අවබෝධයක් හා රස වින්දනයක් ලබා ගත හැක්කේ උසස් මනසකින් යුත් මනුසතාට පමණි. මිනිසා තම පැවැත්ම සඳහා මූලික අවශ්‍යතා ඉටුකර ගනිමින් ආර්ථික හා සංවර්ධන දියුණුව පළමු පිළිගැනීම යැයි සිතා එක එල්ලේ ඒ පසුපස දිව ගිය ද මිනිසාගේ මානසික සෞඛ්‍ය අසතුටුදායක නම් එකී සංවර්ධනය අර්ථවත් නොවන බව කිව යුතු ය. සාහිත්‍යාවබෝධය හා රසවින්දනය නොමැති මිනිසාට ජීවිතාවබෝධයක් ද නොමැති අතර, ඔවුන්ගේ ජීවිත අසම්පූර්ණ ජීවිතයැයි ද පැහැදිලිවම කිව හැකි ය. සාහිත්‍ය අංග රසවිඳීමෙන් හා එහි නියැළී සිට එහි ඇසුර ලැබීම වර්තමානයේ සමාජයෙන් ගිලිහීයෑමෙන් කෝපය හා අනවබෝධයෙන් විවිධ මත ගැටුම් පැන නඟියි. මෙකී සියලු කාරණා පහකර, ජීවිතාවබෝධය ලබා දෙමින් සුන්දර දිවියක් කරා “සාහිත්‍ය රසාස්වාදය” මිනිසා රැගෙන යනු ඇත.

කොළඹ යුගයේ පද්‍ය කෘතියක් වූ “සුදෝසුදු” නම් අව්‍යාජ පාරිසරික සෞන්දර්යාත්මක නිර්මාණය අදටත් අපව සුන්දර ගමකට රැගෙන යන අතර, වසර ගණනාවක සිට විවිධ තර්ක විචාරයන්ට ලක් කිරීමට “මනමේ” නාටකය අති උසස් ලෙස යොවුන් හදවත් පොළඹවා ඇත. මෙකී හා සමාන තව තවත් නිර්මාණ අපව වසර ගණනාවක් ඉදිරියට ගෙන ගොස් ජීවත් කරවනවා මෙන්ම විටෙක තවත් නිර්මාණ අප සෝ සුසුම් නිවාලන්නේ ඒවාට පිළිතුරු ද ලබා දෙමින් ය. යම් ව්‍යංගාර්ථවත්වූ ගීත අප දුක්බර හිත සනසන අතර විඩාව නිවාලන්නේ ද ඖෂධ මෙන් ය.

රූපවාහිනිය හා සමාජ මාධ්‍යවලට පමණක් නෙත් යොමමින් මළවුන් මෙන් ජීවත් නොවී සාහිත්‍යාංග ඇසුරින් මනස පෝෂණය කරගෙන මිනිසාගේ ‘මනුසත් බව’ පලායෑමට ඉඩ නොතබා සමාජීය ප්‍රිය උපදවන හොඳ මිනිසුන් බවට අපි පත්වෙමු.

මෙතුම්ලි මුදලිගේ ,

11 ශ්‍රේණිය,

මධ්‍ය විද්‍යාලය,

පිළියන්දල.

*******************

නාවා

දේශීය ශාක විශේෂයක් වන නවා ර්චතමචජඥචඥ කුලයට අයත් ශාකයකි. නාවා මීටර් 20ක් පමණ උසට වැඩෙයි සෙ.මී. 12ක් දක්වා දිගට වැඩෙන පත්‍ර සියුම් බවක් සහිත ය. පුෂ්ප මංජරියක හට ගන්නා කුඩා කොළ පැහැති මලින් යුතු ය. බූව සහිත ළා කොළ පැහැති ගෙඩි පොකුරු වශයෙන් පිහිටයි. එක් පොකුරක ගෙඩි 4-5ක් දැකිය

හැකි ය. මේරූ ගෙඩි තැඹිලි පාටට හුරු රතු පාටක් ගනියි. ඒවා කුහරමය වන අතර, ගෙඩියක් තුළ කළු පැහැති බීජ හට ගනියි. ගෙඩිය පැලී, පිටතට පෙනෙන සේ දර්ශනය වන විට අලාංකාරවත් ය. නාවා ගෙඩි පැලුණු පසු ඉතිරි වන ඵලාවරණ පහන් දැල්වීමට යොදා ගනියි. නාවා ශාකයේ පොත්ත නාවා පට්ටය ලෙස හඳුන්වයි. එයින් වෙන් කරගත් කෙඳි කඹ ඇඹරීමටත්, විසිතුරු භාණ්ඩ සෑදීමටත්, ගවයන්ට නාස්ලණු දැමීමටත් සුලභව යොදා ගනියි. මෙම කෙඳි වර්ගය කෘෂිකර්මික කටයුතු සඳහා ඉතා ප්‍රයෝජනවත් ය. නාවා ගසෙහි පොත්ත සියුම්ව තැලීමෙන් හෝ ජලයෙහි බහා තැබීමෙන් කෙඳි වෙන්කරගත හැකි ය.

“ පරිසරය අපි රකියි – රකිමු අපි පරිසරය” යන තේමාව යටතේ පරිසරයට හිතැති, පරිසරය සුරකින පාසල් පරිසර නියමුවන් වශයෙන් අපි මෙම වටිනා ශාක හඳුනා ගැනීමටත්, අනාගත පරපුර උදෙසා

සංරක්ෂණය කිරීමටත් කටයුතු කරමු.

ර්.ර්‍ථ තෙනුරි නවින්මා කීර්තිසේන

7 ශ්‍රේණිය

කු/ මලියදේව බාලිකා විද්‍යාලය

කුරුණෑගල

**************

සුන්දර බඩල් කුඹුර

බදුලු ඉඳන් අපි මොනරාගල යනවා

ගමේ වෙලෙන් බෑවුම් ටික ඇරඹෙනවා

සුන්දර නගරයකි බෑවුම් නිමවෙනවා

වෙහෙස නිවන්නට පොඩ්ඩක් නවතිනවා

නමින් බඩල්කුඹුරයි මේ නගරෙ නම

බෝගවලින් සශ්‍රීකයි නගරෙ ගම

මැණික්,කුඹුක්කන් ගංගා සහිත ගම

හරිම ප්‍රසිද්ධයි ලංකාවේ ම ගම

සුන්දර පරිසරයක් ඇති සේම

ආසියාවේ විශාලම අටමුණි සෑය

මෙහේ ඉඳන් අපි දැක්කා සියැසින්ම

බඩල්කුඹුර සුරපුරයකි දිවියේම

ඩී.එම්.හසිත කල්හාර දිසානායක

12 වැනි ශ්‍රේණිය,

මො/නිශ්ශංක මධ්‍ය මහා විද්‍යාලය,

බඩල්කුඹුර.

බොහෝ විරුවන් දේශපාලන සටන් බිමට පිවිසිලා සටන් කරන විරුවන් ය. එහෙත් සමහරු තමන්ගේ ලේඛන හැකියාව යොදා ගනිමින් රට ජාතිය ආගමට සේවයක් ඉටු කරති. මෙවැනි සේවයක් කළ විරුවකු ලෙස පියදාස සිරිසේන මහතා හැඳීන්විය හැකි ය. ඔහු සිය අසිපත කරගනු ලැබුවේ තමන්ගේ පෑනයි. 1875දී උපත ලද පියදාස සිරිසේන මහතා අප මුලින්ම හැඳීන්වූයේ කවියකු වශයෙනි. පුවත්පත් සංස්කාරකවරයකු, නවකතාකරුවකු, චතුර කථිකයකු වූ පියදාස සිරිසේන මහතා පළමුවෙන් කොළඹ ලී බඩු සාප්පුවක ලිපිකරුවකු ලෙස සිය ජීවිතය ආරම්භ කළේ ය. මේ වකවානුවේදී ඉංග්‍රීසිහු තමන්ට හා බ්‍රිතාන්‍ය රජයට විරුද්ධව සිංහලයන් සමඟ පෑන මෙහෙයවමින් සටන් කළේ ය. පියදාස සිරිසේන සිංහල ජාතිය යන පුවත්පතින් ජාතික මෙහෙයක් ඉටු කළේ ය.

රට ජාතිය, ආගම වෙනුවෙන් ජීවිතය පරදුවට තබා සටන් වැදුණු ලේඛකයන් අතර, පියදාස සිරිසේන මහතාට හිමිවන්නේ කිසිවකුට නොදෙවෙනි ස්ථානයකි. රටට වැඩක් නැති රටේ සංවර්ධනය හා සංස්කෘතිය පිරිහෙන්නට හැර තිබුණු පරණ මැති සබය අහෝසිකර දැමීම නිමිත්තෙන් වහල්මුත්තා නමින් හෙතෙම රචනා කළ පැදි පෙළ ඔහුගේ ජාති මමත්වය කදිමට කියාපාන්නකි. 1921 පෙබරවාරි මාසයේදී ලියූ එම පද්‍ය පන්තියේ මෙසේ සඳහන් වේ.

ගොඩ මඩ කුඹුරු ගොවිතැන් වැනසූය සත්තේ
ගොඩ කොට වැව් අමුණු වල් බිහි කර ගත්තේ
දඩ මුඩ මිසක් රට හැදුමක් නැත චිත්තේ
හඬමුද මෙනුඹ මළහයි මැති සබ මුත්තේ

සිංහල සිරිත් විරිත් වනසමින් ගමින් ගමට රා කඩ තිබුණු අයහපත් තත්ත්වය පිළිබඳ ද ඔහු කවියෙන් පැහැදිලි කළේ ය. බොහෝවිට සිංහල සිරිත් විරිත් මිනිසුන් කඩ කිරීම නිසා ඇති වී තිබෙන භේදකාරී තත්ත්වයන් පිළිබඳ ද විස්තර කරමින් එතුමා කවි ලියුවේ ය. සුද්දන්ගේ ක්‍රියාකලාප නිසා බොහෝ දෙනා රා බීමට ඇබ්බැහි වූහ. මේ තත්ත්වය නිසා කවිය අවියක් කරගනිමින් පහර දීමට පියදාස සිරිසේන මහතා ඉදිරියට පැමිණියේ ය. මේ නිසා ජනතාව අතර ඔහු අභීත කවියකු ලෙස ඉදිරියට පැමිණියේ ය. මොහුගේ කවි කියවන පාඨකයෝ සුරාව සූදුවෙන් ඉවත්වීමට ද කටයුතු කළහ. සෑම දෙයකටම වඩා දරුවන්ගේ විනය වඩා වැදගත් බව කී පියදාස සිරිසේන මහතා ඒ සම්බන්ධයෙන් තරුණ දරුවන් සිටින මව්පියන් දැනුම්වත් කළේ ය.

නදී

මේ කාලය අනුරාධපුර රාජධානි සමයයි. එහිදී මෙරට පැමිණි ද්‍රවිඩයෝ අනුරාධපුර රාජධානිය පාලනය කළහ. මේ අනුව පුලහත්ථ, භිගිය, පනයමාර, පිළියමාර, දාඨිය පාලනය කිරීම ඇරැඹූහ. එයින් පසු නැවතත් වළගම්බා රජු රට පාලනය කළේ ය. මේ රජතුමාගෙන් පසු මහාචූලි මහා තිස්ස රජතුමා පාලනය කළේ ය. වළගම්බා රජුගෙන් පසු පාලකයා වූයේ මේ රජු ය. මහසිළු මහතිස් නමින් ද මේ රජතුමා හඳුන්වනු ලැබුවේ ය. මේ රජතුමා වසර තුනක් වෙස්වලාගෙන ස්වර්ණගිරි ප්‍රදේශයේ දාසයකු ලෙස රැකියාවක්කර එයින් ලබාගත් මුදලින් භික්ෂූන් වහන්සේලාට උක් හකුරු සහ සිවුරු දන් දුන්නේ ය. කුඹුරුවල ගොයම් කපා ලැබූ මුදලින් භික්ෂූන් වහන්සේලාට දන් දුන්නේ ය. මොහු මහානාග කුමරුගේ සොහොයුරා ය. මේ රජතුමාගෙන් පසු මහානාග රජතුමා රජ වූයේ ය. මොහු මහාවංශයේ කතුවරයා විසින් චෝර නාග ලෙසින් හඳුන්වාදී තිබේ. මොහු වළගම්බා රජුගේ පුත්‍රයා ය. මහාචූලි මහා තිස්ස රජු සමයේ ඔහු ඉතා දාමරික කුමරකු ලෙස හැසිරුණු බව ද සඳහන් වේ. ඔහු වෙහෙර විහාර විනාශ කරමින් ඉතා නපුරු ලෙස හැසිරුණු බව ද සඳහන් වේ. ඒ නිසාම ඔහුට චෝර නාග යනුවෙන් ද ප්‍රසිද්ධ වූයේ ය. කුඩා කාලයේ මොහු නොයෙක් වැරැදි කිරීම නිසාම සැඟවී සිටියේ ය. මේ රජතුමාගේ මව වූයේ සිංහල ඉතිහාසයේ ප්‍රබල රැජනක් වූ සෝමා දේවියයි. මහා නාගගේ රාජ්‍ය සමයේදී මහා විහාරික භික්ෂූහු ඔහුට බෙහෙවින් විරුද්ධව කටයුතු කළහ. මහා විහාරයට රජතුමා ගිය එක් අවස්ථාව භික්ෂුන් වහන්සේලා රජතුමා මඟහැර සිටියහ. මේ අයුරින් ප්‍රසිද්ධ ස්ථානවලදී මෙතුමා කොන් විය.

පුංචි දූලා පුතාලා පරිසරයට ආදරය කරනවා වගේම ශාකවලටත් ආදරය කරනවා නේද ? පරිසරය අලංකාර වන්නේ විවිධ ශාක වර්ගවලින් නේ. පරිසරය අලංකාර කරන මේ ශාක විවිධ සතුන් විසින් විනාශකර දමනවා. ඔවුන්ගේ ආහාර සපයා ගැනීමට, වාසස්ථාන සඳහා මෙම ශාක ලබා ගන්නවා. ඒ වගේම ඇතැම් සතුන්ගෙන් මිනිසාට හානි ඇති වෙනවා. එනිසාම මෙවර මිහිර පෝස්ටරය සැකසෙන්නේ කොළ වර්ග කන එහෙත් මිනිසාට අනතුරු ඇති සතුන්ගෙනි.

ගෝරිල්ලා

ගෝරිල්ලා ශාක භක්ෂක සතෙකි. මෙම සත්ත්වයා ගොඩබිමේ වාසය කරන වානරයෙකි. ඔවුහු සමකය අසාන්න ප්‍රදේශවල සහ අප්‍රිකාවේ නිවර්තන වනාන්තරවල වාසය කරති. ගෝරිල්ලන් වර්ග දෙකකින් සමන්විත ය. එනම් නැඟෙනහිර ප්‍රදේශයේ ගෝරිල්ලන් සහ බටහිර ප්‍රදේශයේ ගෝරිල්ලන් ලෙසිනි. මෙම වර්ග දෙකම මීටර් 5 සිට 1.8ක් පමණ උසින් යුක්ත වේ. ගෝරිල්ලා කොළ වර්ග සහ පලතුරු වර්ග ආහාරයට ගනියි. ඔවුන්ගේ මූලික ආහාරයක් වන්නේ උණ ශාකයයි. පෙඳ, පාසි, ලයිකන වැනි ශාක මෙන්ම අපූරු හැඩයකින් යුත් සෙනෙකා ශාක ද, ලොබිලියා ශාකය ද ආහාරයට ගනියි. මිනිස්සු මොවුන්ගේ සමීපයට ගියවිට ඇතැම් අවස්ථාවල හානි කිරීමට ද මොවුහු පෙලඹෙති.

හිපපොටේමස්

හිපපොටේමස් දිවා කාලය ගත කරනු ලබන්නේ ගංගාවක, විලක හෝ වැවක පතුලේ ගිලී සිටීමෙන් ය. හිපපොටේමස් සවස් කාලයේ අඳුර වැටීමත් සමඟ ආහාර සොයමින් ගොඩබිම වෙත පැමිණෙයි. හිපපොටේමස්ගේ ප්‍රධාන ආහාරය වන්නේ තණ කොළ වර්ගයි. මෙම හිපෝ පවුලේ සාමාජිකයන් දෙදෙනෙක් සිටිති. එනම් හිපෝ සහ ප්‍රමාණයෙන් කුඩා පිග්මි හිපෝ යන වර්ග දෙකයි. මේ හිපෝ විශේෂයන් දෙකම දකින්න ලැබෙන්නේ සමකයට ආසන්නයේ අප්‍රි‍කානු රටවලයි. මෙම සත්තු කෑමට කෑදර වේ. විශාල වශයෙන් තණකොළ බුදීමේ හැකියාව මෙම සතාට තිබේ. මෙම සතුන් රංචු වශයෙන් කෑම සොයා යනවිට තණබිම මෙන්ම වගා බිම් ද විනාශ වේ. හිපපොටේමස් නිසා ඇතැම් අවස්ථාවල මිනිස් ජීවිතවලට ද හානි සිදු වේ.

රිළවා

රිළවා සර්ව භක්ෂක සතෙකි. මෙම සත්ත්වයා රංචු වශයෙන් වාසය කරයි. සමහර රිළවුන් වෘක්ෂ මත ජීවත්වන අතර, තවත් සමහරු සැවානා මත ජීවත් වෙති. රිළවු පලතුරු, කොළ, බීජ, ගෙඩි, මල්, බිත්තර සහ කුඩා සත්තු ආහාරයට ගනිති. මොවුහු ශාකවල කොළ කඩා දැමීම සහ මල්, ගෙඩි වර්ග ආදිය කඩා දමමින් විනාශ කරති. රිළවා මිනිසුන් සමඟ වාසය කිරීමට පුරුදු වීමත් සමඟම මිනිසා සමඟ සටන්කර ඔවුන් සතුව තිබෙන ආහාර උදුරා කන තත්ත්වයට පත් වී ඇත. ගෙවතුවලට පැමිණෙන රිළවුන් එහි තිබෙන පලතුරු, පොල්, ළපටි ශාක විනාශකර දැමීමට පුරුදු වී තිබේ. රිළවුන් වැඩිම හානියක් සිදු කරන්නේ පොල්වලට ය.

වල් ඌරා

වෙරළබඩ තැනිතලා බිම්වල, කඳුකර ප්‍රදේශයේ, වියළි කලාපයේ ලඳු කැලෑවල සහ තෙත් කලාපීය වනාන්තරවල වල් ඌරා ජීවත් වේ. වල් ඌරා ක්ෂීරපායි සතෙකි. බොහෝ විට වල් ඌරා රංචු ලෙස ජීවත් වේ. මෙම සත්ත්වයා මළකුණු, සර්පයන්, පණුවන්, ශාක වර්ග ආහාරයට ගන්නා සර්වභක්ෂක සත්ත්වයෙකි. ගස්වලින් බිමට පතිත වූ පලතුරු සහ පොළොව හාරා සොයා ගන්නා අල වර්ග ද වල් ඌරාගේ ආහාර අතර ප්‍රධාන තැනක් ගනියි. රාත්‍රියේදී ආහාර සොයා යන විට මිනිසාගේ හේන් වගාවන්, කුඹුරු, වෙනත් වගාවන් සහ ගෙවතුවලට විශාල ලෙස හානි කරන සත්ත්වයකු ලෙස වල් ඌරා සැලකෙයි. මොවුහු ශාකවලට විශාල ලෙස හානි කරති. ඇතැම් අවස්ථාවලදී මිනිස් ජීවිතවලට වල් ඌරෝ හානි කරති.

මොනරා

මොනරා පක්ෂි ලොවේ අලංකාර කුරුල්ලෙකි. මොනරා ලෙස පිරිමි සත්ත්වයා හඳුන්වන අතර, සෙබඩ ලෙස ගැහැනු මොනරා හඳුන්වයි. මොනරා සර්වභක්ෂක සත්ත්වයෙකි. ශාක, මල්පෙති, ධාන්‍ය වර්ග, කෘමීන් සහ උරගයන් වැනි සතුන් ආහාරයට ගනු ලබයි. එමෙන්ම මොනරා වගා හානි ද සිදු කරයි. ශාක පත්‍ර කා දැමීම, පලතුරු සහ එළවළු වැනි දෑ විනාශ කිරීම ද මොනරාගේ ක්‍රියාවකි. කෑම හොයාගෙන උදේ වරුවේත්, ඉර බැසගෙන යන සැන්දෑවටත් පිටත්වෙයි. කුස හොඳීන් පුරවාගත් පසු මොවුන්ගේ ඉතිරි කාලය වැය කරන්නේ පිහාටු පීරිම, වැලි නෑම වැනි කටයුතු වෙනුවෙනි.

දඬු ලේනා

වනාන්තරවල, තෙත් කලාපීය ප්‍රදේශවල සහ වයඹ පළාත්වල දඬු ලේනා වැඩි වශයෙන් ජීවත් වේ. වැඩුණු දඬු ලේනකුගේ ශරීර ප්‍රමාණය සෙන්ටිමීටර් 25ත් සෙන්ටිමීටර් 45ත් අතර වේ. ගැහැනු දඬු ලේනා පිරිමි දඬුලේනාට වඩා තරමක් විශාල වේ. ලෝම තට්ටුවකින් වැසුණු සම සීත කාලයේදී දඬු ලේනාට කාලගුණයට ඔරොත්තු දීමට උදවු වෙයි. ගස් නැඟීමට සහ ගසින් ගසට පැනීමට ශූරයකු වූ දඬුලේනාට උදවු වන ප්‍රධානතම දෙය වන්නේ දිගු, ශක්තිමත් වලිගයයි. පලතුරු, පොල්, ධාන්‍ය වර්ග, ඇතැම් ගස්වල පොතු ආහාරයට ගනු ලබයි. බොහෝවිට දඬු ලේනා පොල් වගාව විනාශ කරයි.

ගොළුබෙල්ලා

ගොළුබෙල්ලා යනු කටු සහිත ගැස්ට්‍රොපොඩ් වර්ගයට අයත් මෙම සත්ත්වයා කම්මැළිකමේ සංකේතය ලෙස ද හඳුන්වයි. ගොළුබෙල්ලාගේ ආරක්ෂාව සඳහා කටුව පිහිටා ඇත. කශේරුකාවක් නොමැති සත්ත්වයෙකි. මෙම සත්ත්වයා ශාක පත්‍ර ආහාරයට ගනු ලබයි. රාත්‍රි කාලයේ ආහාර සෙවීමට පැමිණෙයි. ගොළුබෙල්ලා පත්‍ර කා දමමින් ශාකය දුර්වල කරයි.

දළඹුවා

දළඹුවා යනු ඹ්ඥනඪඤධනබඥපච ගණයේ සාමාජිකයන්ගේ කීට අවධියයි. දළඹුවන්ට මෘදු ශරීරයක් ඇති අතර, වේගයෙන් වර්ධනය විය හැකි ය. දළඹුවන්ට කටු වැනි ශාක කොටස්වලට සමාන කශේරුකා හෝ වර්ධනයන් තිබිය හැකි ය. දළඹුවා ශාක භක්ෂක සතෙකි. දළඹුවෝ පත්‍ර ‘කන යන්ත්‍ර’ ලෙස හඳුන්වනු ලබති. ප්‍රධාන වශයෙන් කොළ ආහාරයට ගැනීමෙන් විශාල හානියක් කිරීමට දළඹුවන්ට හැකියාව තිබේ. එමෙන් දළඹුවෝ ශාක පත්‍රවල යුෂ ද ඌරා බොති.

ඇන්ටිලොප්

මෙම සත්ත්ව වර්ගය අප්‍රිකාවේ තැනිතලා හා සැවානා බිම්වල ජීවත් වේ. ඇන්ටිලොප් සත්ත්වයාට වේගයෙන් දිවීමේ

හැකියාව ඇත. බොහෝ සතුන්ට ඉහළට විහිදුණු, පසුපසට ඇඹරී ගිය අං තිබේ. සාමාන්‍යයෙන් ඔවුන්ගේ සම රන්වන්, රතු මිශ්‍ර දුඹුරු, අළු පැහැ ගනියි. හොම්බ පසුපස සුදු හෝ ළා පැහැයකින් යුක්ත වේ. සමහර සතුන්ගේ සිරුරෙහි අලංකාර ඉරි වැටී තිබේ. මෙම සතුන් තණකොළ සහ විවිධ පැළෑටි ආහාරයට ගනියි. රංචු වශයෙන් සිටියදී තණකොළ සහ ශාක පෑගී විනාශ වී යයි.

අලියා

අලියා ගොඩබිම වෙසෙන විශාලතම සත්ත්වයා ය. අලියාගේ කැපී පෙනෙන ශරීරාංගයක් වන්නේ හොඬවැල ය. අලියාගේ ශරීරයේ ඇති අනෙක් විශේෂි අංගයක් වන්නේ කන් යුවළයි. මේ කන් සැකසී ඇත්තේ අවට ඇති ශබ්ද තරංග හැකිතාක් කන් ඇතුළට යොමුවන ලෙසට ය. එනිසා අලියන්ට ඉතා සුළු ශබ්දයක් පවා ඉතා හොඳීන් ඇසීමේ හැකියාව ඇත. එමෙන්ම ශරීර උෂ්ණත්වය පිටකිරීමේදී මෙම කන් වැදගත් කාර්යයක් ඉටු කරයි. අලි නිතරම තම දෙකන්වලින් පවන් සලයි. අලියන් ශාක භක්ෂක වේ. තණකොළ, ගස්වල පොතු, ඉදී වැටුණු පලතුරු වර්ග හා තාල වර්ගයේ ශාක පත්‍ර මොවුන්ගේ ප්‍රියතම ආහාර වේ. හේන් වගා පාළු කරනු ලබයි. වට්ටක්කා, පුහුල්, පැණිකොමඩු වැනි ශාක වර්ග විනාශ කරනු ලබයි.

පැන්ඩා

පැන්ඩා චීනයේ ජීවත් වන වලස් විශේෂයකි. ඇස්, කන්, කකුල් සහ උරහිස් වටා කළු පැල්ලම් සහිත ය. සුදු පැහැති කබායක කළු පැල්ලම් ඇති ලෙසින් පැන්ඩාගේ සිරුර පෙනෙයි. පැන්ඩාගේ සිරුර වටකුරු ය. පැන්ඩා ශාක භක්ෂක සතෙකි. පැන්ඩා උණ සහ උණ රිකිලි ආහාරයට ගනියි. යෝධ පැන්ඩකු උණ රිකිලි කිලෝග්‍රෑම් 9 සිට කිලෝග්‍රෑම් 14 දක්වා ආහාරයට ගනියි. වගා කටයුතුවලට පැන්ඩාගෙන් හානි සිදු වෙයි.

සැකූසුම – චතුරි ලක්ෂිකා

ශ්‍රී ලංකා බාලදක්ෂිකා සංගමයේ සාමාජිකාවන්ට ජනාධිපති පදක්කම් පිරිනැමීම ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී පසුගිය 31 වැනිදා පැවැත්විණි.

2022 – 2023 වසර සඳහා බාලදක්ෂිකාවන් 772ක් සඳහා ජනාධිපති පදක්කම් හා 2023 වසර සඳහා අගමැති සම්මාන 15 ක් පිරිනැමීම මෙහිදී සිදු කෙරුණු අතර, ශ්‍රී ලංකා බාලදක්ෂිකා සංගමයේ සභාපතිනි ශාන්ති විල්සන් මහත්මිය දෑතින් ජනාධිපති රනිල් වික්‍රමසිංහ මහතා වෙනුවෙන් ද විශේෂ සිහිවටන තිළිණයක් පිළිගැන්වූවා ය.

අධ්‍යාපන අමාත්‍යාංශයේ ලේකම් තිලකා ජයසුන්දර, ශ්‍රී ලංකා බාලදක්ෂ සංගමයේ ප්‍රධාන බාලදක්ෂ කොමසාරිස්, නීතිඥ ජනප්‍රිත් ප්‍රනාන්දු, ශ්‍රී ලංකා බාලදක්ෂිකා සංගමයේ ප්‍රධාන කොමසාරිස්, ආචාර්ය කුෂාන්තා හේරත් මහත්ම මහත්මීන් සහ බාලදක්ෂිකාවන් විශාල පිරිසක් මෙම අවස්ථාවට එක්ව සිටියහ.

නුවන් කොඩිකාර

” මල් පෙත්තේ මල් පෙත්තේ

උතුරු දෙසට දකුණු දෙසට

බටහිරටත් නැඟෙනහිරට

ඉගිළ ඉගිළ මෙහැම දෙසට

කැරකීලා ඇවිත් බිමට

මකියන දෙය කරදෙන් මට”

රෂිනි මේ පද පේළිය මුමුණද්දී එයාගේ අක්කා ආශිනී එතැනට ආවා.

“හොඳයි කියන්න බලන්න ඔය කවිය තියෙන පොත මොකක්ද කියලා”

ආශිනී රෂිනිගෙන් ඇසුවා.

“මං ආසම ආසා හත්පෙතිමල පොතේනේ”

“හරියට හරි ” ආශිනී කිව්වා.

“අක්කෙ ඔයා ආසම රුසියානු ළමා කතාව මොකක්ද?”

රෂිනි එයාගේ අක්කා ආශිනීගෙන් ඇසුවා.

” මං නම් ආසම නිකීතාගේ ළමා කාලය පොත”

“මං නම් වෙන කිසිම රුසියන් කතා පොතකට වැඩිය ආසම ආසම හත්පෙති මල පොත”

“හත්පෙති මල පොතට මාත් ආසයි. ඔයා දන්නවද ඒ පොත සිංහල භාෂාවට පරිවර්තනය කළේ කවුද කියලා?”

“නෑ කවුද?”

“ඒ තමයි දැදිගම වී. රුද්‍රිගු කියන මාමා”

“එතකොට නිකීතාගේ ළමාකාලය ?”

“ඒකත් පරිවර්තනය කරලා තියෙන්නේ රුද්‍රිගු මාමා තමයි”

“එතකොට වැඩ බැරි දාසගේ කතා?”

“ඒවත් රුද්‍රිගු මාමා තමයි පළමුවරට පරිවර්තනය කරලා තියෙන්නේ”

“වීර කුහුඹුවා ? එතකොට සුදු මුවා? රතු කරමලා?”

“ඒකත් මේ මාමම තමයි”

“මොනවා? ඒ ඔක්කොම රුසියානු ළමාකතා ඒ මාමා ද පරිවර්තනය කරලා තියෙන්නේ?” රෂිනි ඇස් ලොකු කරගෙන පුදුමයෙන් ඇසුවා.

“ඔව් නංගි එයා තමයි රුසියානු ළමා සාහිත්‍ය ලංකාවට හඳුන්වලා දීලා තියෙන්නේ. ළමා සාහිත්‍ය කෘති විතරක් නෙවෙයි සෝවියට් රුසියානු නවකතා සහ කෙටිකතා ගොඩකුත් රුද්‍රිගු මාමා සිංහල භාෂාවට හරිම ලස්සනට පරිවර්තනය කරලා තියෙනවා”

” මට ආසයි ඒ මාමා ගැන තොරතුරු ටිකක් දැනගන්න”

“ආ මං දැක්කා අද මිහිර පත්තරේ ඒ ගැන තොරතුරු තියෙනවා. එන්න අපි ඒක කියවමු”

ජීවන තොරතුරු

* උපන්දිනය – 1929 ජූනි 25

* උපන් ස්ථානය – මීගමුව

* සම්පූර්ණ නම – දොන් වින්සන්ට් රුද්‍රිගු

* ලේඛන කලාවේදී  භාවිතවන නාමය – දැදිගම වී. රුද්‍රිගු

* ඉගෙනුම ලැබූ පාසල් – ගමේ පාසලේ ප්‍රාථමික අධ්‍යාපනය සහ ද්විතීයික අධ්‍යාපනය

* අධ්‍යාපනය – කොටහේන ශාන්ත බෙනඩික් විද්‍යාලය

1957- ලෝක තරුණ උලෙළට සහභාගි වීම සඳහා රුසියාවට යෑම

1960 – රුසියාවේ මොස්කව් නුවර ජනතා මිත්‍රත්ව සරසවියට (ලුමුම්බා විශ්වවිද්‍යාලය) ඇතුළත් වී වෛද්‍ය උපාධිය හැදෑරීම

* වෘත්තිය – වෛද්‍ය වෘත්තිය/පරිවර්තක

* බිරිය – යුක්රේනයේ කිවි නගරයේ විසූ මිලිටරි ගුවන්යානා සැලසුම් ශිල්පිනියක වන ලුද්මිලා මෝර්ව්කොව්නා විෂ්නපෝල්ස්කයා

* දරුවන් – වැඩිමහල් පුතු – වික්තර් දෙවැනි පුතු – දිමිත්‍රි

70 දශකයේදී රුසියාවේ සේවය කරමින් එරට ස්ථිරව පදිංචිව සිටියදී වෘත්තීය පරිවර්තකයකු වශයෙන් සෝවියට් රුසියානු ග්‍රන්ථ සිංහල භාෂාවට පරිවර්තනය කිරීම ඇරැඹීම

* අභාවය – 1988 නොවැම්බර් 27

* ලැබූ සම්මාන – ලියෝ තොල්ස්තෝයි සම්මානය -2005

එතුමා පරිවර්තනය කළ ග්‍රන්ථ

ඔහු විවිධ ග්‍රන්ථ 200කට අධික සංඛ්‍යාවක් පරිවර්තනයකර තිබේ.

ළමා කතා, සුරංගනා කතා සහ ජන කතා, යොවුන් කතා, නවකතා, කෙටිකතා වෙනත් විෂයයන් (දේශපාලන, විද්‍යාව, ගණිතය, ඉංජිනේරු විද්‍යාව) ආදී වශයෙන් එම පොත් වර්ග කළ හැකියි.

ළමා කතා

හත්පෙතිමල – වලෙන්තීන් කතායෙව්

මාෂා සහ වලසා

පුංචි සත්තු – ඇලෙක්සේයි ලාප්තියෙව්

කම්මැළියාට ලියුමක් – වයි.අකීම්

වීර කුහුඹියා – තත්යානා මකාරවා

පණ ඇති තොප්පිය – නිකොලායි නෝසොව්

ලපයා හපනා

වී කරල – යුක්රේනියානු ජනකතාවක්

රතු කරමලා – රුසියානු ජනකතාවක්

යූෂ්කා – අලෙක්සන්දර් කුප්රින්

රසකතා – රුසියන් ගත්කරුවන්ගේ ළමා කතා එකතුවකි

ඇත් පැටවා – ගෙනාදි සිපරෙව්

වැඩ බැරි දාස ගැන කතා – නිකොලයි නෝසොව්

නිල් පාට කොළ – වී. ඒ. ඔසීයෙවා

රත්තරන් යතුර හෙවත් බුරතිනෝගේ හපන්කම්-අලෙක්සේයි තොල්ස්තෝයි

මී හාමී දියට ගියා – ළමා කවි

නිල් කබාය සහ මායාකාර රජ- බෙලොරුසියානු ජනකතාවක්

සුදු මුවා – ලැට්වියානු ජනකතාවක්

ළමයින්ට ඉර හඳ තාරකා ගැන කතා – යෙප්රෙම් ලෙවිතාන්

සීයාගේ ඇස් කණ්ණාඩි-ගියෝර්ගි යුර්මින්

ලස්සන මාළුවෝ – වික්ටර් දට්ස්කේවිච්

දේදුන්නෙන් සෙවණ ලබන වන පොව්වෝ -නිකොලායි ස්ලද්කොව්

පින්තූර කතා – එන්. රැඩ්ලොව්

ගල් වඩුවා

වලසුන් තුන්දෙනා – ලෙව් තොල්ස්තෝයි උපමා කතා

මිනිසා ගුවන්ගත වෙයි – කාල් අරොන්

ටෙලිෆෝනය

ලෙව් තොල්ස්තෝයි ළමා කතා

සිංහයා සහ බලු පැටියා

ලී බෝනික්කා සහ යකින්න

යුසිකේගේ මිතුරන් සත්දෙනා – සිල්වි වල්‍යාල්

තෑග්ග-වී. සුතෙයෙව්

වීර යට්ටෝගේ සහ තෙයුන්ගේ කතන්දරය – උතුරු රුසියාවේ නෙන්ට්ස් ජනකතාවක්

යොවුන් කතා

මගේ හපන්කම් – ගපූර් ගුල්යාම්

නිකීතාගේ ළමා කාලය – අලෙක්සේයි තොල්ස්තෝයි

ලස්සන වසිලීස්සා

නපුරු පාලකයෝ තුන්දෙනා – යූරී ඔලේෂා

වැලි සෙල්ලම

නවකතා

ගුරු ගීතය – චිංගීස් අයිත්මාතොව්

අම්මා – මක්සිම් ගෝර්කි

වානේ පන්නරය ලැබූ සැටි – නිකලොයි ඔස්ත්‍රොව්ස්කි

ජමීලා – චිංගීස් අයිත්මාතොව්

අම්මා සහ මිහිකත – චිංගීස් අයිත්මාතොව්

අනර්හායිහි සුන්දර කත – චිංගීස් අයිත්මාතොව්

සුන්දර නතාෂා – මක්සිම් ගෝර්කි

රතු රුවල් – අලෙක්සැන්දර් ග්‍රීන්

අපරාදධය හා දඬුවම -ප්යෝදෝර් දොස්තයෙව්ස්කි

සූදු අන්තුවා -ප්යෝදෝර් දොස්තයෙව්ස්කි

බේල්කින්ගේ කතා – ඇලෙක්සැන්ඩර් පුෂ්කින්

කපිතන්ගේ දියණියෝ – ඇලෙක්සැන්ඩර් පුෂ්කින්

මක්සිම් ගෝර්කි චරිතාපදාන ත්‍රිත්වය

(ළමා විය, මිනිසුන් අතර, මගේ සරසවි)

සැබෑ මිනිසකුගේ කතාවක් – බරිස් පලෙවොයි

අපේ කාලයේ වීරයෙක් – මිහායිල් ලෙර්මන්තොව්

නැති වුණ වස්තුව

අඳ වාදකයා – වී.කරලෙන්කො

දුබ්රොව්ස්කි – ඇලෙක්සැන්ඩර් පුෂ්කින්

ඉස්කෝප්ප රැජණ – ඇලෙක්සැන්ඩර් පුෂ්කින්

උණු හිම – යූරී බොන්දරෙව්

තුන් අවුරුද්ද – ඇන්ටන් චෙකෝව්

කෙටිකතා

සෝවියට් රුසියන් කෙටිකතා කලඹ ඪ, ඪඪ, ඪඪඪ

හතළිස් එක් වැන්නා-මක්සිම් ගේර්කි

ඇන්ටන් චෙකොව්ගේ කෙටිකතා

චින්ගීස් අයිත්මාතව් කෙටිකතා

මක්සිම් ගෝර්කිගේ කෙටිකතා

නිකොලායි ගොගොල් තෝරා ගත් කෙටිකතා

නාසය, සිත්තම

ප්යෝදර් දොස්තයෙව්ස්කි තෝරාගත් කෘති

ඇලෙක්සන්දර් පුෂ්කින් තෝරාගත් කෘති

දොන් පෙදෙසේ කතා- මිහයිල් ෂෝලහව්

විද්‍යා සහ ගණිත ග්‍රන්ථ

දයලෙක්තික භෞතික විද්‍යාව

නදේෂ්ඩා නඩේජනාගේ උද්භිද විද්‍යාව පිළිබඳ තොරතුරු කෘතිය

එම්. නෙස්‌තූර්ග් ගේ මිනිසාගේ සම්භවය

හැමට හොරෙන් ලෝකෙ වටේ–නිකොලයි ඕසිපව්

අරුම පුදුම ගස්

අසිරිමත් කෘමි සත්තු

ගණිත විනෝදය- වයි.පෙරෙල්මාන්

ගණිත හෝඩිය

භෞතික විද්‍යා විනෝදය

ඉංජිනේරුවකු වීමට ඔබත් කැමැතිද?

ග්‍රහලෝකයක විනාශය- සෝවියට් විද්‍යා ප්‍රබන්ධ

දේශපාලන ග්‍රන්ථ

මාක්ස් සහ එංගල්ස් ගැන ස්මෘති සටහන්, ලෙනින්

මාක්‌ස්‌ සහ එංගල්ස්‌ගේ කොමියුනිස්‌ට්‌ ප්‍රකාශනය, වී. ජී. අපනාසියෙව්ගේ මාක්‌ස්‌වාදී දර්ශනයේ මූලධර්ම

රුද්‍රිගු මාමාගේ පරිවර්තන

එකල සෝවියට් සමූහාණ්ඩුවට රටවල් 15ක් අයත් වී තිබිණි. රුසියාව, යුක්රේනය, බෙලාරුසියාව, උස්බෙකිස්ථානය, කසකස්ථානය, ජෝර්ජියාව, අසර්බයිජානය, ලිතුවේනියාව, මෝල්දාවියාව, ලැට්වියාව, කිර්ගිස්ථානය, ටජිකිස්ථානය, ආර්මේනියාව, තුර්ක්මේනිස්ථානය සහ එස්තෝනියාව එම රටවල් 15යි. මේ නිසා එකල රුසියානු සාහිත්‍යයට මේ රටවල් 15ටම අයත් ජනකතා, සුරංගනා කතා ඇතුළත් වූ අතර, එම රටවල් 15ටම අයත් ලේඛකයන්ගේ ලියූ කෘති ද රුසියානු සාහිත්‍යයට ඇතුළත් විය. මේ සෑම සෝවියට් රටකටම අයත් සාහිත්‍යය කෘති රුද්‍රිගු මාමා සිංහල භාෂාවට පරිවර්තනයකර තිබේ.

ඔහු පරිවර්තනය කළ අගනාම කෘති කිහිපයක්

ඔහුගේ පරිවර්තනය කෘති අතර වඩාත්ම වැදගත් කෘති ලෙස

සැළකෙන්නේ අම්මා , ගුරු ගීතය , වානේ පන්නරය ලැබූ සැටි කෘති සහ

හත්පෙතිමල සහ ලස්සන වසිලීස්සා යන ළමා කතන්දර පොත් ය.

අම්මා

මක්සිම් ගෝර්කිගේ ප්‍රකටම නවකතාවක් ලෙස සැළකෙන අම්මා කෘතිය සෝවියට් රුසියාවේ ශ්‍රේෂ්ඨ ඔක්තෝබර් සමාජවාදී විප්ලවය ජයග්‍රහණය සඳහා බෙහෙවින් බලපා තිබේ. විප්ලව සමයේ අරගලවල යෙදෙන පාවෙල් නමැති නිර්භීත කම්කරු තරුණයාට අසාධාරණයට එරෙහිව සටන් වැදීමට සහාය වන ඔහුව නිතරම දිරිගන්වන එඩිතර මවකගේ චරිතය මෙහි ඉස්මතු වී පෙනෙයි.

වානේ පන්නරය ලැබූ සැටි

නිකොලායි ඔස්ත්‍රොව්ස්කි විසින් රචනා කරන ලද මෙම කෘතියෙහි ද පාවෙල් කෝර්චාගින් නමැති කම්කරු තරුණයා ධනපතිවාදයට එරෙහිව අරගල කර ජය ගන්නා ආකාරය දැක් වේ.

ගුරු ගීතය

ඔහු විසින් අනුවර්තනය කරන ලද රුසියානු ලේඛක කිර්ගිස්ථාන් ලේඛක චිංගීස් අයිත්මාතොව්ගේ දුයිෂේන් හෙවත් පළමු ගුරුවරයා

ගුරු ගීතය එදා මෙදාතුර සිංහල පාඨකයන් අතර නොමඳ ගෞරවාදරයට පාත්‍ර වි තිබෙයි. දුයිෂෙන් නම් ගුරුවරයා අල්තීනායි නමැති දුප්පත් දැරියට ජීවිතය මෙන්ම සිප් සතර ද කියා දී ඇයට යහපත් අනාගතයකට මඟ පෑදූ ආකාරය මෙහි දැක් වේ.

“ඔව්, ශීත කාලය පැමිණේවි. තද ශීත කුණාටු හමාවි. හිම කැට සහිත මහ නපුරු සුළි සුළං හමාවි. එහෙත් වසන්තය එනවා සත්තයි”

ගුරු ගීතයේ අඩංගු මෙම වාක්‍ය කිසිදා අමතක නොවෙයි.

හත්පෙතිමල

වලෙන්තීන් කතායෙව්ගේ රුසියානු ළමා කතාවක් ඇසුරෙන් රුද්‍රිගු මාමා අනුවර්තනය කරන ලද අපූරු ළමා කතාවකි මෙය. ශේන්යා නමැති දැරිය පාන් වළලු ගෙන එන්නට ගොස් එමින් සිටියදී ඇයට හමුවන මායාකාරියක විසින් දෙනු ලබන පාට හතක් සහිත මායාකාර මලෙහි පෙති හත කඩා විවිධ දේ ලබා ගන්නා ආකාරය මෙම කතන්දරයේ දැක් වේ. නිකරුණේ මල් පෙති හයක් එතරම් ප්‍රයෝජනයක් නොමැති දේවලට වැය කරන ශේන්යා පාදයක ආබාධ සහිත වීත්යා නමැති පිරිමි ළමයා සුව කරගැනීමට අවසන් මල් පෙත්ත භාවිත කිරීම කතාව අවසානයේදී දැක්වේ .

ලස්සන වසිලීස්සා

රුසියානු සුරංගනා කතා අඩංගු මෙහි බබායිගා මායාකාරියගේ චරිතය ද දැක ගත හැකි ය.

මේ සියලු කතා රුසියානු බසින් ඍජුවම සිංහල භාෂාවට පරිවර්තනයකර තිබීම ද රුද්‍රිගු මාමාගේ දක්ෂතාවක් ලෙස විශේෂයෙන් හැඳීන්විය හැකි ය. එමෙන්ම අපට නුපුරුදු රුසියානු සංස්කෘතිය අපට ඉතා සමීප කරවීමට ද රුද්‍රිගු මාමාගේ අගනා පරිවර්තන හැකියාව බෙහෙවින් සමත් වී තිබේ. රුසියාවේ වාලෙන්කි හිම සපත්තු, සමොවාරය (තේ සෑදීමට ජලය උණු කරන ලෝහ බඳුන), පොප්ලර් ගස් සහ හිම යනාදියත් මාෂා, මීෂා, සාෂා, මීෂ්කා, සාෂෙන්කා, පාවෙල්, පාව්කා, දුයිෂේන්, අල්තීනායි , නතාෂා, ඉවාන්, මර්යූෂ්කා යන නම් ද ශ්‍රී ලාංකික අපට මෙතරම් හුරු කළාට අපි දැදිගම රුද්‍රිගු මාමාට බෙහෙවින් තුති පුදමු.

හර්ෂණී ගමගේ

සෑම දරුවකුගේම අභ්‍යන්තරයේ සැඟවුණු දක්ෂතාවක් ඇති බව අපට පසක්වනුයේ කාලයක් ගත වීමෙන් පසු ය. මේ දක්ෂතාව කුඩා කාලයේදී සිටම මව්පියන් සහ ගුරුවරුන් හඳුනාගත හොත් එය ජයග්‍රහණයකි. ලොවේ එකෙක් එක් දෙයකට වෙයි සමත යනුවෙන් කියමනක් තිබුණත් ඇතැම් දරුවන් දක්ෂතා දක්වන අංශ කිහිපයක් ඇති බව ඔවුන්ගේ ප්‍රායෝගික ක්‍රියාකාරකම්වලින් මනාව පැහැදිලි වේ. එවැනි දක්ෂ දරුවන් ගැන අත්දැකීම් බහුල විදුහල්පතිනියක් සමඟ කතාබහක් ඇති කරගන්නයි අපේ මේ සූදානම. ඇය කළුතර මියුසියස් විද්‍යාලයේ විදුහල්පති නදීෂා ප්‍රියංගිකා ය. ඉතින් ඇය දරුවන් ගැන කියන කතාව කෙබඳු ද යන්න පිළිබඳ අපි විමසා බලමු.

මම දරුවන් දකින්නේ නොයෙක් ආකාරයේ මල් ලෙසයි. මගේ පාසලෙත් නොයෙක් ආකාරයේ මල් පිපිලා තියෙනවා. මේ මල් පිපෙන්න පටන් ගන්නේ සෑම උදෑසනකමයි. මම ඒ වෙලාවට පාසලේ ගේට්ටුව ළඟට ගිහිල්ලා සෑම මලක්ම පිළිගන්නවා. මම දරුවන්ට ඒ වෙලාවෙදී කියනවා. ආ හරිම ලස්ස පුතෙක්, හරිම ලස්සන දුවෙක්. ඔයාලාට සුබ දවසක් වේවා කියලා. ඒ ගොල්ලොත් මට ඒ වෙලාවට කියනවා. මැඩම් හරිම ලස්සනයි කියලා. සමහර අය මට මල් ගේනවා. තවත් සමහර අය මට ගේට්ටුව ළඟදිම දණ ගහලා වඳීනවා. මම හිතන්නේ විදුහල්පතිනියකගෙයි දරුවන්ගෙයි ඇති දුරස් බව එයින් අයින් වෙනවා කියලා. දරුවකු තේරුම් ගන්න නම් ඒ දරුවාට ගොඩක් සමීප වෙන්න අවශ්‍යයි. ”

” මම උදෙන්ම පාසලට එනවා. මම උදෙන්ම පාසලට පැමිණියාම දරුවන්ටත් උදෙන්ම එන්න වෙනවා. මම හිතන්නේ ක්‍රියාවෙන් ලබා දෙන ආදර්ශය වචනයෙන් කියන කතාවට වඩා බලවත් කියලා. මම හැම දෙයක්ම ප්‍රායෝගිකව කරලා පෙන්වන්න උත්සාහ කරන්නේ ඒ නිසාමයි. අර සුභාෂිතයේ කවියක් තියෙනවා නේ. එක පුන් සඳීන් දුරුවෙයි ලොව ඝන අඳුරු කියලා. ඒත් මම එක දවසක් පුතාලා දුවලාට මෙහෙම කිව්වා. පුතේ දුවේ ඒ කවියා එහෙම කිව්වාට කමක් නැහැ. ඔයා හැමෝම තරු කැට. තරුවලටත් පුළුවන් ලස්සනට දිලිසෙන්න. ඔයගොල්ලො හැම කෙනෙක්ම තරුවක්. ඒ විදිහට සෑම දරුවකුම ශක්තිමත් කරන්න මට ආසයි. මම මේ පාසලට ආව මුල්ම කාලෙ කිව්වේ සෑම දරුවකුම නායකයෙක් කියලා. ඒ කියන්නේ සෑම දරුවකුගේ අභ්‍යන්තරයේ කුමන හෝ දක්ෂතාවක් ඇති පුද්ගලයකු ජීවත් වෙනවා. ගුරුවරු වශයෙන් අපි එය අවබෝධ කරගන්න අවශ්‍යයි. පාසලක් සාර්ථක වන්නේ දරුවාගේ නිපුණතාව හඳුනා ගැනීමෙන් පමණයි. මෙය කිරීමට මම සෑම විටම උත්සාහ දරනවා. පාසලක් කියන්නේ නායකයන් නිර්මාණය කරන ස්ථානයක්. නිවැරැදි ආකාරයට නායකයකු ගොඩනඟා සමාජගත කිරීමෙන් එය සමාජයටත් සම්පතක්. වර්තමානයේ නායකයන් අඩුයි කියලා තමයි මට හිතෙන්නේ. එයට හේතුව කුඩා කාලයේදිම ආකල්ප සංවර්ධනය කරලා නැතිකමයි. මේ පරමාර්ථය පෙරදැරි කරගෙන මම දරුවන් නායකත්වයට හුරු කරන්න උත්සාහ කළා”

” මම මේ පාසලට ආව මුල් කාලයෙදි සෑම දරුවකුම නායකයකු කියන සංකල්පය ඔවුන්ගේ සිතට කාවැදෙන අයුරින් කියා දුන්නා. එයට හේතුව එක එක දරුවන්ට තියෙන්නේ එක එක දක්ෂතා. ඒ දක්ෂතා අප හොඳීන් හඳුනාගන්න අවශ්‍යයි. මගේ පාසලේ දරුවන් හයසිය පහළොවක් ඉන්නවා.

ඒ වගේම ගුරුවරු තිස් තුන්දෙනෙක් ඉන්නවා.පුහුණුව ලබන ගුරුවරු පස්දෙනෙක් ඉන්නවා. මම කියලා තියෙන්නේ සෑම කෙනකුටම දරුවන් හඳුනාගන්න කියලා. අප දරුවන් හඳුනාගැනීමට අපොහොසත් වුණොත්, එයින් දරුවන්ට විතරක් නෙවෙයි පාසලටත් සිදු වන්නේ හානියක්. එනිසා දරුවන් පිළිබඳ අවබෝධ කරගැනීම අපේ වගකීමක්. මෙවර මම ළමයින් 90 දෙනකු ශිෂ්‍ය නායකයන් ලෙස තෝරා පත් කරගන්නවා. මේ පාසලේ වැඩිම ශිෂ්‍ය නායක පිරිසක් පත් වන්නේ මෙවරයි. එයින් පාසලට ලොකු ශක්තියක් වේවි කියලා මම බලාපොරොත්තු වෙනවා. හෙට පිපෙන මල්වලින් රටට උපරිම සුවඳක් හමා යෑමට සැලැස්වීම මගේ බලාපොරොත්තුවක්.”

ඇගේ ප්‍රාර්ථනා ඒ අයුරින්ම ඉටුවේවා යන්න අපි මිහිරෙන් සුබ පතමු.

රූපාන්ති බුලත්සිංහල

ඡායාරූප – පාසලේ ඡායාරූප අංශය

ආදරණීය දුවේ පුතේ, අධිතාක්ෂණික ලෝකය එක්ක තාරකා විද්‍යාව ඉදිරියට යන්නෙ හරි අපූරු විදියට. මිනිසාට තම ජීවත්වීමේදී අත්‍යවශ්‍ය වන සේවාවන් ලබා ගැනීම කාර්යක්ෂම කිරීමට වක්‍රව ලෙස දායක වෙන්න තාරකා විද්‍යාවට හැකි වී තිබේ.

Starlink යනු කුමක්ද?

Starlink යනු Elon Musk විසින් පවත්වාගෙන යනු ලබන ඉනචජඥඔ සමාගම විසින් නිර්මාණය කරන ලද ව්‍යාපෘතියකි. Starlink හි පරමාර්ථය වන්නේ ලොව පුරා සිටින පුද්ගලයන්ට, විශේෂයෙන්ම අන්තර්ජාල සේවාව හොඳ නැති සහ කිසිසේත්ම ලබා ගත නොහැකි ස්ථානවලට වේගවත්, විශ්වාසදායක අන්තර්ජාල ප්‍රවේශයක් ලබා දීමයි.

එය ක්‍රියාත්මක වන ආකාරය

Starlink පෘථිවිය වටා කක්ෂගත වන කුඩා චන්ද්‍රිකා විශාල ජාලයක් භාවිත කරයි. මෙම චන්ද්‍රිකා අන්තර් ජාල සංඥා බිමට බැසීමට එක්ව ක්‍රියා කරයි. එය ක්‍රියා කරන ආකාරය පිළිබඳ මූලික වශයෙන් ඔබට හඳුනා ගත හැකි ය.

අභ්‍යවකාශයේ චන්ද්‍රිකා

* ඉනචජඥඔ බොහෝ කුඩා චන්ද්‍රිකා පහළ පෘථිවි කක්ෂයට දියත් කරයි. මෙම චන්ද්‍රිකා ඉක්මනින් පෘථිවිය වටා ගමන්කර ජාලයක් සාදයි.

බිම් ස්ථාන

චන්ද්‍රිකා සමඟ සන්නිවේදනය කරන විශේෂ ස්ථාන භූමියේ ඇත. මෙම මධ්‍යස්ථාන චන්ද්‍රිකාවලින් ලැබෙන අන්තර්ජාල දත්ත කළමනාකරණය කිරීමට උපකාරී වේ.

ස්ටාර්ලින්ක් වැදගත් වන ආකාරය

Starlink හේතු කිහිපයක් නිසා වැදගත් වේ.

ගෝලීය ආවරණය

සාම්ප්‍රදායික අන්තර්ජාල සේවා ලබා ගත නොහැකි දුරස්ථ සහ ග්‍රාමීය ප්‍රදේශ ඇතුළුව සෑම තැනකම අන්තර්ජාල ප්‍රවේශය සැපයීම එහි අරමුණයි.

වේගය සහ විශ්වසනීයත්වය

Starlink අඩු ප්‍රමාදයක් සහිත අධිවේගී අන්තර්ජාල පහසුකම් සපයයි. එයින් අදහස් වන්නේ එහි වේගවත්බව සහ විශ්වාසදායක බවයි.

ආපදා ප්‍රතිසාධනය

ස්වාභාවික විපත් මඟින් දැනට පවතින සන්නිවේදන යටිතල පහසුකම් විනාශකර ඇති ස්ථානවල, Starlink හට ඉක්මනින් අන්තර්ජාල ප්‍රවේශය ලබා දිය හැකි ය.

අභියෝග

Starlink හි බොහෝ ප්‍රතිලාභ ඇති අතර, සමහර අවස්ථාවල අභියෝග ද ඇත.

පිරිවැය පරිශීලක පර්යන්තය සඳහා මූලික සැකසුම් පිරිවැය ඉහළ විය හැකි ය. එහෙත් ඉනචජඥඔ එය වඩාත් දැරිය හැකි මිලකට ලබා දීමට කටයුතු කරයි.

අභ්‍යවකාශ සුන්බුන්

අභ්‍යවකාශයේ බොහෝ චන්ද්‍රිකා සමඟ, අභ්‍යවකාශ සුන්බුන් සහ ගැටීමේ අවදානම ගැන සැලකිලිමත් වේ.

ආවරණ හිඩැස්

සමහර ප්‍රදේශවල ජාලය දිගින් දිගටම ප්‍රසාරණය වන බැවින් සංඥාව තවමත් දුර්වල විය හැකි ය.

අනාගත සැලැස්ම

Starlink ජාලය වැඩිදියුණු කිරීමට සහ පුළුල් කිරීමට SpaceX නිරන්තරයෙන් කටයුතු කරයි. ලොව පුරා වඩා හොඳ ආවරණයක් සහ වේගවත් අන්තර්ජාල සේවාවක් ලබා දීම සඳහා තවත් චන්ද්‍රිකා ගුවන්ගත කිරීමට ඔවුහු සැලසුම් කරති.

රුසින් තත්සර

මොරටුව විශ්වවිද්‍යාලය

දුවේ පුතේ, ඔන්න අපේ මේ සූදානම අදත් උරුමයක වගතුගවලින් ඔයාලට ශ්‍රී ලංකාවේ ඓතිහාසික වශයෙන් වැදගත්කමක් තිබෙන ස්ථානයක තොරතුරු කියන්නයි. අද මම තෝරා ගත් ස්ථානය තමයි දකුණු පළාතේ වැලිගම අග්‍රබෝධි විහාරස්ථානයට ආසන්නයෙන් පිහිටා ඇති කුෂ්ඨරාජගල පිළිමය ගැන කතාවයි.

මීටර් තුනයි දශම අටයි තුනක් පමණ උස මෙම පිළිමය කළු ගලක් ඇතුළට හෑරූ විවරයක් ඇතුළත නෙළා ඇත. මෙම පිළිමය සම්බන්ධයෙන් පවතින ජනප්‍රවාදවලට අනුව කුෂ්ඨ රෝගයකින් පෙළුණු කුමාරයෙක් විසින් ඉදිකරන්නට ඇතැයි විශ්වාස කරයි. එම කුමාරයා අග්‍රබෝධි විහාරයට තම කුෂ්ඨ රෝගය සුව කිරීම උදෙසා කළ භාරයක් ඔප්පු කිරීමට මෙම පිළිමය ඉදිකර තිබේ. ඔහු මෙම ස්ථානයේ එක දිගට මාස තුනක් තැඹිලි පමණක් ආහාරයට ගනිමින් වාසය කළ බව ද එම ජනප්‍රවාදයේ තවදුරටත් සඳහන් කරයි. ආචාර්ය නන්දිසේන මුදියන්සේ පවසන්නේ මෙම පිළිමය නෙළා ඇති ගලේ තැනින් තැන දක්නට ලැබෙන ළා පැහැති පැල්ලම් විශේෂයක් නිසා මෙම ජනප්‍රවාදය බිහිවන්නට ඇති බවයි.

එහෙත් ජනප්‍රවාදයේ සඳහන් වන ආකාරයට මෙම පිළිමයෙන් නිරූපණය වන්නේ කුමාරයකු නොව මහායාන බෝධිසත්වවරයකු බව එම පිළිමය පිළිබඳ අධ්‍යයනය කළ විද්වතුන් ඒකමතිකව පිළිගන්නා කරුණකි. 1925දී මේ පිළිබඳ අදහසක් දක්වන ආචාර්ය ඒ. නෙල් මහතා මෙයින් නිරූපණය වන්නේ සිංහ නාද අවලෝකිතේශ්වර බෝධිසත්වයන් බව ප්‍රකාශ කරයි. සිංහනාද අවලෝකිතේශ්වරයන් කුෂ්ඨ රෝග නිවාරණය සම්බන්ධයෙන් ප්‍රචලිත බෝධිසත්වවරයකු වන හෙයින් එම මතය හා ජනප්‍රවාදය අතර යම් ගැළපීමක් අපට දැක ගත හැකි ය. මෙම බුදු පිළිමයේ හිස් පලඳනාවේ ධ්‍යානී බුදු පිළිම හතරක් දක්නට හැකි අතර, පසුපසින් තවත් බුදුපිළිම හතරක් ඇති බවත් විශ්වාස කරයි. එහි දකුණු අතින් ව්‍යාඛ්‍යාන මුද්‍රාව සහ වමතින් කටක හස්ත මුද්‍රාව නිරූපණයකර අතර, ඇති ධ්‍යානී බුද්ධ රූප සමාධි ඉරියව්වෙන් නිරූපිත ය. එම බුදු පිළිම අමිතාභ බුදුරජාණන්වහන්සේ වශයෙන් හඳුනාගෙන ඇත. මහාචාර්ය සෙනරත් පරණවිතාරණයන් ද එම මතය පිළිගෙන තිබේ.

මහාචාර්ය වැන් ලෝග්ව්සන් මහත්මිය ප්‍රකාශ කරන්නේ මෙය සමන්තභද්‍රයන්ගේ ප්‍රතිමාවක් බවයි. ඇය එම පිළිමයෙහි දකුණු අතෙන් විතර්ක මුද්‍රාව නිරූපණය වන බවක් ප්‍රකාශ කරයි. පරණවිතාරණ මහතා ද පසු කාලයේදී මෙම මතය පිළිගෙන තිබේ. මහාචාර්ය පී. එල්. ප්‍රේමතිලක මහතා ද තම ‘මංජු ශ්‍රී චිත්‍ර කර්ම ශාස්ත්‍රය’ නම් ග්‍රන්ථයේදී මෙම පිළිමය සමන්තභද්‍ර ප්‍රතිමාවක් බව පිළිගෙන තිබේ.

ගුප්ත සම්ප්‍රදායේ ලක්ෂණ පෙන්නුම් කරමින් හත – අට ශත වර්ෂවල ඉදිකරන ලදැයි සැලකෙන මෙම ප්‍රතිමාව මංජු ශ්‍රී බෝධිසත්වයන්ගේ ප්‍රතිමාවක් බවට මතයක් මහාචාර්ය දොහානියන් ඉදිරිපත්කර ඇත. ඔහු එම පිළිමයෙහි එක් අතක චින් මුද්‍රාව ද එක් අතක නිල්මහනෙල් මලක් ද දරන බවට ප්‍රකාශ කරයි. සියලු මත සමාලෝචනය කරමින් මහාචාර්ය චන්ද්‍ර වික්‍රම ගමගේ මහතා මෙම මතය පිළිගෙන තිබේ.

ලක්නා නිරෝෂිමාලා