සමාන පද හඳුනා ගනිමු
සමාන පද
සමාන පද යනු යම් පදයක තේරුමට සමාන තේරුමක් ඇති තවත් පදයි. සමාන පද සඳහා පර්යාය පද යන වචනය ද යොදයි. ඇතැම් පදවලට සමාන පද රාශියක් තිබෙන අතර, ඇතැම් පදවලට සමාන පද ඇත්තේ කිහිපයක් පමණි.
නත්තල්
සීතල උඳුවප් හිම කැටි වැටුණා
අමුතුම තරුවක් පායා දිලුණා
බිලිඳු හඬක් ගවලෙනකින් ඇසුණා
සුර කුමරුන් සැම තුටු ගී ගැයුවා
මරිය මව් කුසේ ඉපදුණු බිලිඳූ
ජේසු ස්වාමි අප සාමයෙ රජිඳූ
ලොවටම ප්‍රේමය පුද කළ සමිඳූ
නුඹේ නමින් මේ බැති ගී පුදමූ
නැති බැරි අය හට තෑගි පුදන්නෙමු
අඳුරු පැලට ඉටිපහනක් දල්වමු
ලොවටම සාමය නිබඳ පතන්නෙමු
නුඹේ නමින් නත්තල් සමරන්නෙමු
මෙම කවියෙහි තිබෙන ඇතැම් පදවලට සමාන පද
සීතල – සිසිල්
බිලිඳු – ළදරු
හඬක් – ශබ්දයක්, නාදයක්
සුර – දේව
තුටු – සතුටු, ප්‍රීති, සන්තෝෂ
ගී – ගීත, සින්දු
මව් – මාතා, අම්මා, ජනනි, මෑණී
කුසේ – උදරයේ
රජිඳු – නිරිඳු, රජු
ප්‍රේමය – ආදරය, ආලය
බැති -භක්ති
තෑගි – තිළිණ
අඳුරු – අන්ධකාර, තිමිර
නිබඳ – නිරතුරු
ඡේදය කියවා නාම පද හඳුනා ගනිමු
නාම පද යනු
“සප්‍රාණික සියලුම සතුන් හා අප්‍රාණික සියල්ල හැඳීන්වීමට භාවිත වන නාම” නාම පද ලෙස නිර්වචනය කළ හැකි ය.
පුද්ගලයකු, තැනක්, දෙයක්, පිළිබඳ අර්ථයක් දෙන පද නාම පද වශයෙන් හැඳීන්විය හැකි ය.
පුද්ගල නාම පද, සත්ත්ව නාම පද, ද්‍රව්‍ය නාම පද, ගුණ නාම පද, ස්ථාන නාම පද වශයෙන් නාම පද වර්ග කිහිපයක් තිබේ.
ප්‍රාණවාචී නාම පද සහ අප්‍රාණවාචී නාම පද වශයෙන් ද නාම පද වර්ග කළ හැකිවේ.
සිංහල භාෂාවෙහි ඇති පද අතරින් අති විශාල සංඛ්‍යාවක් ඇති පද වර්ගය වන්නේ නාම පදයි.
ශාන්ත ලුසියාගේ දිනය
ශාන්ත ලුසියාගේ දිනය යනු පැරැණිතම ක්‍රිස්තියානි ශාන්තුවරියක වූ ලුසියා (සැන්ටා ලුසියා හෝ ශාන්ත ලුසී ලෙස ද හැඳීන්වේ.) සිහිකරන දිනයයි. එය දෙසැම්බර් 13 දින සමරනු ලැබේ. ශාන්ත ලුසියා දිනය, ලුසියාඩගන් ලෙස ද හැඳීන්වේ, ස්කැන්ඩිනේවියානු රටවල (ස්වීඩනය, නෝර්වේ සහ ඩෙන්මාර්කය ඇතුළත් කලාපයක්) නත්තල් සමයේ ආරම්භය සනිටුහන් කරන්නේ මෙම උත්සවය සමඟිනි. ශාන්ත ලුසියා දිනය ආලෝකයේ උත්සවයක් වන අතර, එය වසරේ අඳුරුතම කාලය තුළ( එනම් ශීත ඍතුව) බලාපොරොත්තුව සහ ආලෝකය ගෙන ඒම අදහස් කරයි. ස්කැන්ඩිනේවියානු රටවල උත්සවය ආරම්භ වන්නේ තෝරාගත් ලුසියා විසින් මෙහෙයවන ලද ගායන කණ්ඩායමකින් යුත් ළමයින්ගේ පෙරහරකිනි. ලුසියා සුදු පැහැති දිගු ගවුමකින් සැරසී රතු පැහැ සළුවක් ඉණෙහි බැඳ, ඇගේ හිස මත දැල් වූ ඉටිපන්දම් සහිත සදාහරිත මල් රවුමක් පැලඳ සිටියි. ඇය පසුපස යන්නේ සුදු සළුවලින් සැරසුණු තරුණ ගැහැනු ළමයින් සහ පිරිමි ළමයින් ය. ගැහැනු ළමයි ටින්සල්වලින් සැකසූ රවුමක් හිසෙහි පැලඳ, ඉටිපන්දම් රැගෙන යති. පිරිමි ළමයි කේතු හැඩැති හිස්වැසුම් පැලඳ සිටින අතර, මුදුනේ තරුවක් සහිත යෂ්ටි ද රැගෙන යති. ශාන්ත ලුසියා වෙනුවෙන් සැකසූ විශේෂ ගීයක් ද එදිනට ගායනා කරනු ලැබේ. ශාන්ත ලුසියා දිනය දෙව්මැඳුරුවල, ව්‍යාපාරික ස්ථානවල, රෝහල්වල සහ පාසල්වල ද සමරනු ලැබේ. එම නිවාඩු දිනය නිවෙස්වල ද සමරනු ලැබේ. පවුලේ වැඩිමහල් දියණිය එදින උදෑසනින් අවදි වී ශාන්ත ලුසියා ලෙස සැරසී ලුසෙකැටර් (lussekatter) නොහොත් ලුසියාගේ බළලුන් ලෙස හඳුන්වන බනිස් සහ කෝපි සහිත බන්දේසියක් රැගෙන නිවෙසේ අනෙක් සාමාජිකයන් ඇහැරවමින් කාමරයෙන් කාමරයට ගොස් ඒවා ඔවුන්ට පිළිගන්වයි.
මෙම ඡේදයෙන් හමු වූ නාම පද
ශාන්තුවරිය – පුද්ගල නාම පද රට-ස්ථාන නාම පද
ලුසියා – පුද්ගල නාම අඳුරු – ගුණ නාම පද
ශීත – ගුණ නාම පද සුදු – ගුණ නාම පද
රතු – ගුණ නාම පද ඉටිපන්දම් – ද්‍රව්‍ය නාම පද
මල් රවුමක් – ද්‍රව්‍ය නාම පද සළු – ද්‍රව්‍ය නාම පද
ගැහැනු ළමයි-පුද්ගල නාම පද පිරිමි ළමයි – පුද්ගල නාම පද
හිස්වැසුම් – ද්‍රව්‍ය නාම පද යෂ්ටි – ද්‍රව්‍ය නාම පද
දෙව්මැඳුරු -ස්ථාන නාම පද රෝහල් – ස්ථාන නාම පද
පාසල් – ස්ථාන නාම පද නිවෙස් – ස්ථාන නාම පද බළලුන් – සත්ත්ව නාම පද දියණිය – පුද්ගල නාම පද
බනිස් – ද්‍රව්‍ය නාම පද කෝපි – ද්‍රව්‍ය නාම පද
බන්දේසිය – ද්‍රව්‍ය නාම පද කාමරය – ස්ථාන නාම පද
හර්ෂණී ගමගේ
