ආදරණීය දුවේ පුතේ, ඔයාලා දන්නවානේද? දේවස්ථානවලට නත්තලට විශේෂිත ගීත වර්ගයක් ගායනා කරනවා කියලා. මේ ගීතවලින් කියවෙන්නේ නත්තලේ විශේෂිත බවයි. බිලිඳු ජේසුස් මේ ලෝකයට පැමිණියේ කෙසේද? එදින තිබූ අපූර්වත්වය කෙබඳු ද? ජේසුස් වහන්සේ ඉපදුණු දවසේ පරිසරයේ තිබුණු වෙනස්කම් මොනවාද? ජුසේතුමා සහ කන්‍යා මරියතුමිය ඒ අවස්ථාවේ ප්‍රීති වූ ආකාරය, ජේසු බිලිඳා ඉපදුණු ගවලෙනේ තිබූ ස්වභාවය පිළිබඳ අලංකාර වර්ණනාවක් මේ ගීතිකාවලින් කියවෙයි. දුවේ පුතේ, අද අප ඔබට කියලා දෙන්න සූදානම් වෙන්නේ මේ නත්තල් ගීත එහෙම නැතිනම් මේ කැරොල් ගීතවල උපත සිදු වූයේ කුමන ආකාරයට ද යන්නයි. ඉතින් දුවේ පුතේ, මේ ගැන කියවලා බලන්නකෝ. ඔයාලාටත් ඉගෙන ගන්න බොහෝ දේවල් තිබේවි.
නත්තල් බැති ගීතවල ආරම්භය
ජේසු බිලිඳු උපන් අවස්ථාවේදී ගවලෙනට පැමිණි දේවදූතයන් බිලිඳු ඉපදීමේ සතුට පවසමින් ගීතයක් ගැයූ බව ද කිතුනු සාහිත්‍යයේ සඳහන් වේ. එහෙත් මුලින්ම මිනිසුන් අතර නත්තල් ගීත ගායනා කරලා තියෙන්නේ රෝමයෙහියි. මේ ගීත ලියැවිලා තිබිලා තියෙන්නේ ලතින් භාෂාවෙනි. නවවැනි සහ දහවැනි ශතවර්ෂවල උතුරු යුරෝපයේ තාපසාරාමවල දේව භක්තිය සහ කිතු උපත පිළිබඳ නිර්මාණය වූ කාව්‍ය ගායනා කරලා තිබෙනවා. දොළොස්වැනි ශත වර්ෂයේ පැරීසියේ ජීවත් වූ සාන්ත වික්ටර්හි ඇඩම් පියතුමා එකල ජනප්‍රිය වී තිබූ ගීතවල තනු යොදා කිතුනු බැති ගී නිර්මාණයකර තිබේ. නත්තල් දිනයේදී ගායනා කළ මේ ගීත ඇසීම සඳහා බොහෝ දෙනෙක් දේවස්ථානය වෙත පැමිණියහ. මේ නිසාම කිතු උපත පිළිබඳ භක්තියක් ජනතාව අතර ඇති වී තිබේ. නූතනයේදී ගැයෙන කැරොල් ගීතවල ආරම්භය මේ ආකාරයට සිදු වී තිබුණ බව ද වාර්තා වී තිබේ.
දහතුන්වැනි ශත වර්ෂයේදී ප්‍රංශයේ, ඉතාලියේ හා ජර්මනියේ, දේශීය භාෂාවලින් ලියැවුණු ජනප්‍රිය බැති ගී ප්‍රවර්ධනය වී තිබේ. මේ සඳහා ඇසිසියේ ශාන්ත ෆ්‍රාන්සිස් කිතුනු පූජකවරයා මුල් වී තිබේ.
නත්තල් බැති ගී මුල්වරට ඉංග්‍රීසියෙන් ලියැවී තිබෙන්නේ 1426 වර්ෂයේදීයි. මේ සඳහා මූලිකත්වය දැරුවේ ජෝන් අවිඩිලේ පියතුමා ය. මූලික වශයෙන් කිතුනු බැති ගී විසි පහක් පමණ ඉංග්‍රීසියට පරිවර්තනය වී තිබේ. මුල් අවධියේදී ඉංග්‍රීසියෙන් ලියැවුණු නත්තල් බැති ගී ගායනාකර තිබෙන්නේ ගෙයින් ගෙට ගොස් වීදී සංචාරය කරමින් ය. අද ජනප්‍රිය වී තිබෙන නත්තල් බැති ගීත හෙවත් නත්තල් කැරොල්වල ආරම්භක ගීත මුද්‍රණය වූයේ 1582 වර්ෂයේදීයි. මෙය piae Cantiones නම් පොතේ අඩංගු වී තිබිණි. මධ්‍යතන යුගයේදී ලතින් භාෂාවෙන් මුද්‍රණයකර තිබෙන මේ පොතෙහි ඇති ගීත අදත් ඉංග්‍රීසි බසින් නත්තල් දිනයේදී ගායනය කරයි.
මුද්‍රණ තාක්ෂණයත් සමඟ කැරොල් ගීත මුද්‍රණය වීම
දහ නවවැනි ශතවර්ෂයේදී මුද්‍රණ තාක්ෂණය වේගයෙන් දියුණු වීමට පටන් ගත්තේ ය. මේ සමඟ නිර්මාණය වූ කැරොල් ගීත හෙවත් නත්තල් බැති ගී මුද්‍රණය වී ජනතාව අතට පත් විය. බොහෝ මිනිස්සු නත්තල් ගීත කියවා දෙවියන් වහන්සේට ගෞරව කිරීම සඳහා ගායනා කළහ. මුද්‍රණ ද්වාරයෙන් නත්තල් ගී එකතුකර සකස් කළ ගීතිකා පොත් ජනතාවට ලැබීමත් සමඟ නත්තල් ගීත වෙනුවෙන් සාහිත්‍යයක් නිර්මාණය විය. 1871 වර්ෂයේදී මුද්‍රණයකර පළ කළ Chrismas Carols, New and Old යනුවෙන් මේ පොත නම්කර තිබිණි. මෙලෙස මුද්‍රණය වූ පොත වික්ටෝරියානු යුගයේදී නත්තල් කැරොල් හෙවත් නත්තල් බැති ගී දියුණු මට්ටමකට ගෙන ඒමට බෙහෙවින්ම හේතු විය.
ශ්‍රී ලංකාවේ නත්තල් බැති ගීත ජනප්‍රිය වීම
යටත් විජිත සමයත් සමඟ බ්‍රිතාන්‍ය ජාතිකයන්ගේ ඇතැම් අවැතුම් පැවැතුම් ද ලංකාවට ලැබිණි. මේ අනුව ඔවුන්ගේ ඇදහිලි සහ විශ්වාස ද ශ්‍රී ලාංකිකයන් අතර ව්‍යාප්ත විය. මේ තත්ත්වය නිසා ශ්‍රී ලංකාවට හිමි වූ කිතුනු දහමට ආවේණික වූ නත්තල් බැති ගීත ද ශ්‍රී ලාංකියන් අතර ජනප්‍රිය විය. අතීතයේ විවිධ නත්තල් ගීත ලතින් භාෂාවෙන් ඉංග්‍රීසි භාෂාවට පරිවර්තනය වී නැවතත් සිංහල භාෂාවට පරිවර්තනය වුවත්, වර්තමානය වනවිට විවිධ නව ගීත නිර්මාණ වෙයි.
ශ්‍රී ලංකාවේ නිර්මාණ වූ ප්‍රථම
නත්තල් කැරොල් ගීතය
දෙවිඳු උපන්නේය සතුනි
දෙවිඳු උපන්නේ ඔහෝ //
දෙවිඳුනි සර්වනායක වන
දිළිඳු එමනු වෙස් ගනිමින
නිරිඳු දාවිත් කල සසොබන
බිලිඳු ලෙසින මිහි වඩිමින
දෙරණේ තෘණ යහනේ කිම සයනේ සුර රජුනේ
දෙවිඳු උපන්නේ//
රංචු ආණ්ඩුවරු නෙක එති
පංච තූර්ය නාද කරති
නොන්චි නෝම කියමින් තුති
පුංචි දෙවිඳු කුමරු වඩති
දෙවිඳු උපන්නේ//
තෙපලා තුති හොයලා නෙක තොසලා
පසු බැසලා
දෙවිඳු උපන්නේ//
ගොපළුන් සහ එඬේර කොල්ල
බිලිඳුන් දෙවි දකින ලොල්ල
එළුවන් සොඳ අජය මෙල්ල කිරි පැන් සහ බුදිති සියල
පරවින් සහ කුරුලුන් මල් පොකුරුන් පද තබමින්
දෙවිඳු උපන්නේ//
රජවරු එතුන් දෙන සමඟින පඬුරු
රැගෙන ත්‍රිවිදය
කිරුළ සිරස තබා දෙරණ
කුමරු පුදන කළෝ තුටින
සිඹලා වැඳ වැටිලා තුති කරලා
සිර නමලා
දෙවිඳු උපන්නේ//
මෙම ගීතය නිර්මාණය කළේ ගොන්සාල්වේස් පියතුමා ය. මුල් කාලයේදී කැරොල් ගීත නිර්මාණය කළේ මේ පියතුමා ය. මෙවැනි ගීත විශාල ප්‍රමාණයක් එතුමා නිර්මාණය කළේ ය.
ලෝකයේ ප්‍රකට වූ මුල්ම නත්තල් ගීතය වූයේ
we wish you a merry christmas ගීතයයි.
we wish you a merry christmas//
we wish you merry christmas and happy new year
මෙම ගීතය නත්තල් සමයෙහි සුබ පැතීම සඳහා යොදා ගත් ගීතයකි. නත්තලින් පසු එළැඹෙන අලුත් අවුරුද්දට ද මේ මඟින් සුබ පැතුවේ ය.
වන්දනා
